«Толибон» ва Покистон чегарачилари ўртасида 5 январь куни отишма юз берди. Бу ҳақда Hasht-e Subh Daily хабар берди.
Маълум қилинишича, «Толибон» чегарачиси Нангарҳор провинциясига қарашли Торхам назорат-ўтказиш пунктида беихтиёр ўт очган. Ҳодиса оқибатида Афғонистон фуқароси ҳалок бўлган, Покистон чегара қўшинининг бир аскари эса қўлидан яраланган.
Бошқа версияга кўра, можаро покистонлик ҳарбий амалдор «Толибон» жангчиси томонидан яраланганидан кейин бошланган. Ҳужумга жавобан Покистон аскарлари қўлларига қурол кўтарган, уларнинг отишмаси оқибатида тинч афғон фуқароси ҳалок бўлган. Иккала томон ҳам можаро ҳақида ҳозирча баёнот бермади.
Отишма сабабли Покистон Афғонистон билан Торхам халқаро чегара пунктини ёпган.
Эслатиб ўтамиз, «Толибон» ноябрь ойида Покистон билан чегарада тўқнашувларга сабаб бўлган Дуранд чизиғи бўйлаб йўл ётқизди. 11 декабрда «Толибон» чегара кучлари Дуранд линияси яқинида янги пост қуришни режалаштирганидан кейин Покистон чегарачилари билан тўқнашув бошланган.
Ҳодиса оқибатида «Толибон»нинг бир аъзоси ҳалок бўлган, 10 нафари эса яраланганди. Покистон томони эса жангда бир аскар жароҳат олганини хабар қилган.
15 декабрда «Толибон» Дуранд чизиғида пост ўрнатмоқчи бўлганида Покистон ҳарбийлари билан отишма бўлган. Оқибатда бир нафар тинч фуқаро ҳалок бўлган, 15 киши эса яраланган. Покистон чегарага ҳужумчи вертолётлар юборган ва Кобулдаги элчихона ходимларини эвакуация қилган. Томонлар ҳодисада бир-бирини айблаган.
«Толибон» матбуот котиби Забиҳуллоҳ Мужоҳид 15 декабрь куни чегарадаги можаро Покистон ҳарбийлари томонидан бошланганини маълум қилган. Покистон сенатори эса «Толибон» ҳаракати раҳмат ўрнига «қурол билан жавоб берганини» айтган.
Изоҳ (0)