Россия Ички ишлар вазирлиги чет элликлар учун қалбаки никоҳлар ёки оталикни аниқлаш орқали Россияда муҳожирлик мақомини қўлга киритиш имкониятини йўқ қилишга қаратилган қонун лойиҳасини ишлаб чиқди, деб ёзади «ТАСС» идора вакили Ирина Волкка таяниб.
«Ҳозирги пайтда Россия ИИВ томонидан қалбаки никоҳлар ва оталикни сохта равишда белгилаш орқали чет эл фуқаролари ёки фуқаролиги бўлмаган шахслар томонидан РФ ҳудудида муҳожирлик мақомига эга бўлишга йўл қўймаслик мақсадида миграция қонунчилигини такомиллаштиришга қаратилган федерал қонун лойиҳаси ишлаб чиқилди», — деди Волк.
Унинг қайд этишича, айни пайтда қонун идоралараро келишув босқичида турибди. Унинг сўзларига кўра, 2022 йилнинг 11 ойи мобайнида ИИВ илгари Россия фуқароси билан никоҳ тузган чет элликларга Россия ҳудудида яшаш учун берилган рухсатномаларни бекор қилиш ҳақида 400 га яқин қарор қабул қилган.
Амалдаги қонунчиликка мувофиқ, хорижликлар ёки фуқаролиги бўлмаган шахслар Россия фуқароси билан камида уч йил никоҳда бўлган ёки оилада умумий фарзанд бўлган тақдирда, Россия фуқаролигига соддалаштирилган тартибда кириш учун даъвогарлик қилиши мумкин.
Ноябрь ойида Россия ИИВ Миграция масалалари бўйича бош бошқармаси бошлиғи Валентина Казакова 2022 йил бошидан буён қалбаки никоҳ қайд этилиши билан боғлиқ 220 та ҳолат аниқланганини айтганди.
Изоҳ (0)