Қозоғистон президенти Қосим-Жўмарт Тўқаев итларнинг този ва тўбет деб аталувчи миллий зотларини асраш ва қайта тиклаш тўғрисидаги қонунни имзолади.
Този зоти қарийб ўн уч асрлик тарихга эга, ушбу ит зотининг илк тасвирларини палеолитдан Ўрта асрлар бошларигача бўлган даврларга тегишли петроглифлар — тошларга туширилган расмларда учратиш мумкин. Бу зот отлар билан бир қаторда жуда қадрланган, очарчилик йилларида улар ўлжани овлашга ёрдам берган.
Тўбет туркман ити — бўрибосарнинг энг яқин қариндоши ҳисобланади. Улар худди алабайлар каби, кўп асрлар давомида чўпонларга ҳамроҳлик қилиб, сурувларни бўрилардан қўриқлаган ва ҳатто овларда қатнашган.
Қозоғистонда този ва тўбет йўқолиб кетиш хавфи остида турибди. Асосий муаммо — рус тозиси ва афғон тозиси каби зотлар билан аралашиб кетгани. Тўбетлар ҳозирда ўзларининг асосий вазифаси(подани ҳимоя қилиш, бўриларга қарши кураш)ни бажаришда деярли фойдаланилмайди.
Бу зотларни сақлаб қолиш учун Қозоғистонда махсус Миллий марказ ташкил этилган бўлиб, унинг вазифалари ушбу зотлар бўйича мутахассисларни тайёрлаш, итлар кўргазмалари ва намойишларини ўтказишдан иборат бўлади.
Изоҳ (0)