Ижтимоий тармоқларда Тошкент вилоятида (Ўртасаройда) «Док-1 Макс» дори воситасини истеъмол қилган икк ёшли бола вафот этгани ҳақида хабар тарқади. Вилоят ССБ матбуот хизмати буни рад этди.
Маълум қилинишича, ҳозирги кунгача Республика шошилинч тез тиббий ёрдам илмий марказининг Тошкент вилояти филиалига «Док-1 Макс» сиропи истеъмоли натижасида заҳарланиш белгилари билан тўққиз нафар бола олиб келинган. Улардан беш нафари соғайиб, уйига қайтарилган. Тўрт нафарининг аҳволи эса барқарор ҳолатда, уларга тегишли стандартлар асосида муолажалар давом эттирилмоқда.
«Шуни қайд этиш керакки, Тошкент вилоятидаги соғлиқни сақлаш муассасаларида шу пайтгача «Док-1 Макс» препаратидан заҳарланиш туфайли ўлим ҳолати кузатилмаган.
Маълумот ўрнида айтиш мумкинки, ҳозирда ҳудудлардаги барча дорихоналарда ҳуқуқни муҳофаза қилувчи органлар вакиллари ва туман-шаҳар тиббиёт бирлашмалари ходимлари томонидан ўрганиш олиб борилиб, Quramax компанияси томонидан ишлаб чиқарилган дори воситалари йиғиштириб олинган», — дейилади хабарда.
Шунингдек, аҳоли орасида дори-дармонларни шифокор кўрсатмасисиз, палапартиш истеъмол қилишнинг салбий оқибатлари бўйича шифокор ва патронаж ҳамширалари томонидан уйма-уй юриб, тушунтириш олиб борилаётган, бу жараёнда хонадонлардаги шахсий дори қутилари ҳам кўздан кечирилаётгани билдириб ўтилган.
Изоҳ (0)