Украинага жанговар ҳаракатлар оқибатида етган зарар 700 миллиард долларни ташкил этади, бу сумма мамлакат инфратузилмасига ҳужумлар оқибатида икки карра ўсди, дея маълум қилди бош вазир Денис Шмигал вазирлар маҳкамаси мажлисида.
Яқин орада Украинани Россия банкларидан мусодара қилинган маблағлар ҳисобидан қайта тиклашни бошлаш режалаштирилмоқда, бунинг учун махсус ҳисобда 17 миллиард гривна (462,5 миллион доллар) турибди. Устувор мақсад вайрон бўлган уй-жойларни қайта тиклашдан иборат бўлади, деди Шмигал. Жамоат бинолари, муҳим инфратузилма объектларини қуриш ва таъмирлаш, вақтинчалик кўчирилган шахсларни уй-жой билан таъминлаш учун бюджетга 35,5 миллиард гривна (952,3 миллион доллар) қўйилган.
«Мамлакат ичида устувор вазифа инвестиция киритиш учун максимал даражада қулай шароитлар яратишдан иборат. Хусусан, давлат-хусусий шериклик лойиҳаларини тайёрлаш ва амалга оширишни соддалаштитиш. Шунингдек, инвестициявий лойиҳаларга талабларни камайтириш», — деди Украина бош вазири.
У мамлакатни қайта тиклашни 2023 йил учун ўнта приоритетлардан бири деб атади. Қолганлари эса Украина қуролли кучларини таъминлаш, Украинанинг Евроиттифоқ ва НАТО билан интеграциялашуви, жанговар ҳаракатлар фахрийларини қўллаб-қувватлаш дастури, энергетикани диверсификациялаш, ўқувчиларнинг хавфсизлиги, марказлашмаган тизимга ўтиш ислоҳотларини давом эттириш, фонд бозори ва пенсия таъминоти ислоҳотидан иборат.
Сентябрь бошида Шмигал Украинага етказилган тўғридан-тўғри жисмоний зарарни 326 миллиард долларга баҳолаганди, бу суммани мамлакат ҳукумати Жаҳон банки экспертлари билан биргаликда тасдиқлаб беришга муваффақ бўлган.
Изоҳ (0)