Ukraina bugungi kunga qadar harbiy harakatlardan ko‘rgan zararini 326 milliard dollarga baholaydi. Bu haqda mamlakat bosh vaziri Denis Shmigal Yevroittifoq va Ukrainaning Bryusseldagi Assotsiatsiya kengashida ma’lum qildi, deb yozadi “RBK”.
Uning so‘zlariga ko‘ra, ushbu summa bevosita jismoniy zarar bo‘lib, uni Ukraina hukumati Jahon banki ekspertlari bilan birgalikda tasdiqlagan.
Shundan 105 milliard dollari vayron bo‘lgan obyektlarni qayta tiklashga yo‘naltirilishi lozim, deya qo‘shib qo‘ydi Shmigal.
Ukraina prezidenti Vladimir Zelenskiy avvalroq mamlakat infratuzilmasi va iqtisodiyotini qayta tiklash 600 milliard dollarga tushishini aytgan va boshqa davlatlarni Ukraina mintaqalarini otaliqqa olishga chaqirgan edi.
Uning so‘zlariga ko‘ra, Kiyev Ukrainani qayta tiklash bo‘yicha keng ko‘lamli reja tayyorlamoqda, ammo buning uchun xalqaro reja — “tarixiy ‘Marshall rejasi’ning zamonaviy varianti” ham kerak bo‘ladi. Iyul oyida Luganodagi konferensiyada Ukraina 750 milliard dollardan ziyod qiymatga ega mamlakatni qayta tiklash rejasini taqdim etgandi.
“Marshall rejasi” — AQSH tomonidan ishlab chiqilgan, Yevropa mamlakatlariga urushdan keyingi yordamni taqdim etish dasturi. Uning asosiy maqsadi 1948-yildan 1952-yilgacha bo‘lgan davrda Ikkinchi jahon urushidan keyin vayron bo‘lgan Yevropa iqtisodiyotini qayta tiklashdan iborat bo‘lgan.
Kremlda Rossiya aktivlarining Ukraina foydasiga musodara etilishini nomaqbul va noqonuniy deb atashdi. “Bu to‘g‘ridan to‘g‘ri o‘g‘rilik bo‘ladi”, — dedi Rossiya prezidenti matbuot kotibi Dmitriy Peskov.
Rossiya yetakchisi mamlakat LXR va DXRni qayta tiklashda qatnashishini ma’lum qildi. Uning ko‘rsatmasiga binoan DXR va LXRdagi shaharlarni qayta tiklash uchun mas’uliyatni Rossiya mintaqalari o‘z zimmasiga olishni boshladi.
Izoh (0)