Қашқадарё вилоятининг Деҳқонобод туманидаги «Нурли келажак» маҳалласида яшовчи 1,5 ёшли бола «Док-1 Макс» дори воситаси сабаб қурбон бўлгани хабар берилганди. «Дарё» мухбири марҳум боланинг яқинлари билан суҳбатлашиб, бола сиропни қачондан бери истеъмол қилгани билан қизиқди.
Журналист билан суҳбатда ўзини вафот этган боланинг аммаси Шаҳноза Нафасова дея таништирган аёл дорини қишлоқдаги шифокор тавсиясига кўра сотиб олишганини айтди.
Шифокор тавсиясига биноан ўша дори сотиб олинганди. «Дўхтир» ҳам қаердан билибди дейсиз, уям билмаган-да. Укам 16 декабрь куни туман марказидаги дорихонадан шу сиропни сотиб олган. Ўша куни кечқурун жиянимга бера бошлагандик. Жиянимда оз-оз йўтал бор эди. Ҳали ёш, укол қилмасдан сироп ичира қолайлик деган тўхтамга келиб, сиропни ичиргандик-да, — дейди вафот этган боланинг аммаси.Маълум бўлишича, 1,5 ёшли бола «Док-1 Макс» сиропини 16 декабрь куни кечки пайтдан бошлаб истеъмол қила бошлаган, 26 декабрь куни аҳволи ёмонлашиб, туман шифохонасининг тез тиббий ёрдам бўлимига олиб борилган.
Отам-онам ўша куни жиянимни туман тез тиббий ёрдам бўлимига олиб борган. Шифокорлар болани кўриб, даво муолажаларини қилгач, аҳволи яхшимаслигини, шу сабаб уни Қарши шаҳрига олиб бориб кўрсатишлари кераклигини айтган, — дейди боланинг яқини.Шундан сўнг бола дастлаб вилоят болалар шифохонасига, улар қабул қилмагач, Республика шошилинч тиббий ёрдам илмий марказининг Қарши филиалига олиб борилган.
Тез ёрдам маркази ҳам беморни қабул қилмай, уни Тошкентга олиб бориш кераклигини айтган. Болани пойтахтга олиб кетаётган пайтда тез тиббий ёрдам ходимлари болани қайтариб олиб келишини сўраган. Биз жияним ушбу доридан заҳарланганини Қаршидаги текширувлар натижасида билдик. Биз грипп аломатлари деб ўйлагандик. Шифокорлар қандай дори ичиргансизлар расмини ташланглар деб айтишгач, расмини ташладик. Шифокорлар ўша дори буйрак ва жигарга кучли зарар етказганини айтган. Ушбу дорини қабул қилиш тақиқлангани ҳақидаги хабарларни жияним дорини ичиб бўлганидан кейин эшитдик. У пайтда анча кеч бўлганди, — дейди боланинг аммаси Шаҳноза Нафасова.Эслатиб ўтамиз, мазкур сиропни истеъмол қилиш ортидан Самарқандда 18 нафар, Тошкент ва Қашқадарёда бир нафардан, жами 20 нафар бола вафот этгани маълум бўлганди. Сўнгра «Док-1 Макс» дорисининг хавфи хусусида жамоатчилик ҳамда вазирликка хабар берган бош шифокор бошчилигидаги тиббиёт ходимлари ишдан олингани хабар берилди. Масъуллар эса бош шифокорнинг ишдан олинишига айнан бу сабаб эмаслигини билдирди.
Кўп ўтмай Ҳиндистонда мазкур сиропни ишлаб чиқарувчи компанияга жиноят иши қўзғатилиб, мазкур сиропни ишлаб чиқариш тўхтатилди. Кейинчалик Соғлиқни сақлаш вазирлиги «Док-1 Макс» сиропи таркибида заҳарли моддалар аниқланганини, самарқандлик шифокорлар бу ҳақда вазирликни ўз вақтида хабардор қилмаганини айтиб чиқди. Мазкур воқеалардан сўнг Шавкат Мирзиёев Фармацевтика тармоғини ривожлантириш агентлиги раҳбарини ишдан олди. Куни кеча ҳам Фарғонада уч ёшли бола мазкур сиропдан заҳарлангани очиқланди.
Изоҳ (0)