“Dok-1 Maks” dorisini fosh qilgan tibbiyot xodimlari o‘z vaqtida SSVga xabar bermagani ma’lum bo‘ldi

Samarqand viloyatida “Dok-1 Maks” siropidan zaharlanish bo‘yicha holat bo‘yicha vazifasidan ozod etilgan 7 nafar tizim mutasaddisi va tibbiyot xodimi o‘z vaqtida SSVga xabar bermagani ma’lum qilindi.

Onalik va bolalikni muhofaza qilish boshqarmasi boshlig‘i Sevara Ubaydullayevaning ma’lum qilishicha, Sog‘liqni saqlash vazirligi ishchi guruhi tomonidan o‘tkazilgan o‘rganishda bolalarda kuzatilgan holat boshlanganiga 2 oydan oshganligi o‘z tasdig‘ini topgan.

“Vaholanki, tizimga doir har bir favqulodda holat bo‘yicha shu kunning o‘zida vazirlikka tezkor ma’lumot taqdim etish zarurligi to‘g‘risida tegishli me’yoriy hujjat va talablar mavjud. Shunga qaramay, bu xodimlar 2 oydan beri bu holat to‘g‘risida Sog‘liqni saqlash vazirligiga xabar bermagan”, — deydi Sevara Ubaydullayeva.

Oqibatda juda katta vaqt boy berilgan. Ya’ni bolalar o‘rtasida noaniq holatlar yuz bergach, zudlik bilan bu bo‘yicha to‘g‘ridan to‘g‘ri Sog‘liqni saqlash vazirligiga xabar berilmagan. Hududiy sog‘liqni saqlash boshqarmasiga ham mazkur holat yuzasidan juda kech rasmiy xat kiritilgan. Shu sababli qonunchilikda belgilangan tartibda tegishli choralar ko‘rildi va o‘rganishlar davom etmoqda.

Mavzuga doir: Jamoatchilikni “Dok-1 Maks” balosidan ogohlantirgan bosh shifokor ishdan olingani aytilmoqda. Mas’ul buni tasdiqlab, “sababi boshqa” demoqda