Qashqadaryo viloyatining Dehqonobod tumanidagi “Nurli kelajak” mahallasida yashovchi 1,5 yoshli bola “Dok-1 Maks” dori vositasi sabab qurbon bo‘lgani xabar berilgandi. “Daryo” muxbiri marhum bolaning yaqinlari bilan suhbatlashib, bola siropni qachondan beri iste’mol qilgani bilan qiziqdi.
Jurnalist bilan suhbatda o‘zini vafot etgan bolaning ammasi Shahnoza Nafasova deya tanishtirgan ayol dorini qishloqdagi shifokor tavsiyasiga ko‘ra sotib olishganini aytdi.
Shifokor tavsiyasiga binoan o‘sha dori sotib olingandi. “Do‘xtir” ham qayerdan bilibdi deysiz, uyam bilmagan-da. Ukam 16-dekabr kuni tuman markazidagi dorixonadan shu siropni sotib olgan. O‘sha kuni kechqurun jiyanimga bera boshlagandik. Jiyanimda oz-oz yo‘tal bor edi. Hali yosh, ukol qilmasdan sirop ichira qolaylik degan to‘xtamga kelib, siropni ichirgandik-da, — deydi vafot etgan bolaning ammasi.Ma’lum bo‘lishicha, 1,5 yoshli bola “Dok-1 Maks” siropini 16-dekabr kuni kechki paytdan boshlab iste’mol qila boshlagan, 26-dekabr kuni ahvoli yomonlashib, tuman shifoxonasining tez tibbiy yordam bo‘limiga olib borilgan.
Otam-onam o‘sha kuni jiyanimni tuman tez tibbiy yordam bo‘limiga olib borgan. Shifokorlar bolani ko‘rib, davo muolajalarini qilgach, ahvoli yaxshimasligini, shu sabab uni Qarshi shahriga olib borib ko‘rsatishlari kerakligini aytgan, — deydi bolaning yaqini.Shundan so‘ng bola dastlab viloyat bolalar shifoxonasiga, ular qabul qilmagach, Respublika shoshilinch tibbiy yordam ilmiy markazining Qarshi filialiga olib borilgan.
Tez yordam markazi ham bemorni qabul qilmay, uni Toshkentga olib borish kerakligini aytgan. Bolani poytaxtga olib ketayotgan paytda tez tibbiy yordam xodimlari bolani qaytarib olib kelishini so‘ragan. Biz jiyanim ushbu doridan zaharlanganini Qarshidagi tekshiruvlar natijasida bildik. Biz gripp alomatlari deb o‘ylagandik. Shifokorlar qanday dori ichirgansizlar rasmini tashlanglar deb aytishgach, rasmini tashladik. Shifokorlar o‘sha dori buyrak va jigarga kuchli zarar yetkazganini aytgan. Ushbu dorini qabul qilish taqiqlangani haqidagi xabarlarni jiyanim dorini ichib bo‘lganidan keyin eshitdik. U paytda ancha kech bo‘lgandi, — deydi bolaning ammasi Shahnoza Nafasova.Eslatib o‘tamiz, mazkur siropni iste‘mol qilish ortidan Samarqandda 18 nafar, Toshkent va Qashqadaryoda bir nafardan, jami 20 nafar bola vafot etgani ma’lum bo‘lgandi. So‘ngra “Dok-1 Maks” dorisining xavfi xususida jamoatchilik hamda vazirlikka xabar bergan bosh shifokor boshchiligidagi tibbiyot xodimlari ishdan olingani xabar berildi. Mas’ullar esa bosh shifokorning ishdan olinishiga aynan bu sabab emasligini bildirdi.
Ko‘p o‘tmay Hindistonda mazkur siropni ishlab chiqaruvchi kompaniyaga jinoyat ishi qo‘zg‘atilib, mazkur siropni ishlab chiqarish to‘xtatildi. Keyinchalik Sog‘liqni saqlash vazirligi “Dok-1 Maks” siropi tarkibida zaharli moddalar aniqlanganini, samarqandlik shifokorlar bu haqda vazirlikni o‘z vaqtida xabardor qilmaganini aytib chiqdi. Mazkur voqealardan so‘ng Shavkat Mirziyoyev Farmatsevtika tarmog‘ini rivojlantirish agentligi rahbarini ishdan oldi. Kuni kecha ham Farg‘onada uch yoshli bola mazkur siropdan zaharlangani ochiqlandi.
Izoh (0)