Москвада Сурия, Туркия ва Россия мудофаа вазирлари ўртасида уч томонлама музокаралар бўлиб ўтди. Бу ҳақда Bloomberg хабар берди.
Маълум қилинишича, бу Сурия ва Туркия раҳбарияти вакилларининг 2011 йилдан бери илк учрашувидир. Музокараларда Туркия мудофаа вазири Хулуси Акар ва Миллий разведка ташкилоти раҳбари Ҳакан Фидан, шунингдек, Россия мудофаа вазири Сергей Шойгу ва Сурия мудофаа вазири Али Маҳмуд Аббос иштирок этган.
«Сурия инқирози ва қочқинлар муаммосини ҳал қилиш йўллари, Суриядаги экстремистик гуруҳларга қарши биргаликда курашиш масалаларини муҳокама қилдик», — дейилади Россия вазирлиги хабарида.
Учрашув якунлари бўйича томонлар мулоқотнинг конструктив характерини ва Суриядаги вазиятни барқарорлаштириш мақсадида уни давом эттириш зарурлигини айтган.
20 ноябрдан бери Туркия Сурия шимолида тақиқланган Курдистон Ишчилар партияси қанотига қарши ҳаво операциясини ўтказмоқда. Президент Тойиб Эрдўғон операцияни муваффақиятли деб атаган ва унинг ортидан қуруқликдаги операция бўлишини таъкидлаган. Шунингдек, у 2023 йилда Туркия Сурия билан чегарада 30 километрлик хавфсизлик зонасини яратиш учун барча зарур чораларни кўришини билдирган.
Ноябрь ойи охирида Эрдўғон «вақти келганда» Сурия президенти Башар Асад билан музокаралар ўтказилишини айтган, ҳозирда мамлакатлар ўртасидаги алоқалар махсус хизматлар даражасида давом этмоқда. Hurriyet газетаси икки давлат раҳбарларининг учрашуви Россия президенти Владимир Путин воситачилигида ўтиши мумкинлигини прогноз қилган.
Изоҳ (0)