Ўзбекистонга олиб келинган «Док-1 Макс» препаратининг бир нечта партиясида заҳарли модда аниқланди

ССВнинг Оналик ва болаликни муҳофаза қилиш бошқармаси бошлиғи Севара Убайдуллаева иштирокида 29 декабрь куни бўлиб ўтган брифингда «Док-1 Макс» сиропи истеъмол қилганларга тавсиялар берилди.

Қайд этилишича, дори воситаси 10 кун аввал қабул қилинган бўлса ва беморда турли аломатлар бўлмаса, бу жуда хавотирли ҳолат ҳисобланмайди. Аммо шифокорга, ҳолатига кўра Республика шошилинч тиббий ёрдам илмий маркази ва бўлимларига мурожаат қилиш керак.

«Шу ўринда, юртимизга кириб келган ‘Док-1 Макс’ ва шунга ўхшаш шамоллашга қарши сиропларнинг бир неча партиясида заҳарли модда тасдиқланганини маълум қиламиз. Шу пайтгача тиббиётда бу дори воситалари фақат шифокор томонидан аниқ кўрсатма бўлгандагина, болаларнинг ёши, вазни ва бошқа кўрсаткичлари асосида тавсия қилинган ва самарали натижалар олинган.

Яна бир муҳим масала: ‘Док-1 Макс’ сиропи таркибида заҳарли модда тасдиқланганидан сўнг юртимиздаги барча дорихоналарда бу дори воситасининг сотилиши тақиқланиб, улар савдодан қайтариб олинган.

Шунга қарамай, баъзи дорихоналарда ҳануз бу сиропни сотишга уриниш ҳолатлари аниқланаётгани ачинарли ҳолат. Айни сабабдан агар дорихоналарда ‘Док-1 Макс’ сиропи сотилиши билан боғлиқ ҳолат кузатилса, Ўзбекистон Республикаси Соғлиқни сақлаш вазирлиги қошида фаолият юритаётган Штабнинг +99899 807-66-60 телефон рақамига қўнғироқ қилишингизни сўраймиз», — дейди мутахассис.

Мавзуга доир: «Док-1 Макс» дорисини фош қилган тиббиёт ходимлари ўз вақтида ССВга хабар бермагани маълум бўлди