Ўзбекистонда 2021—2022 йилларда беш мингга яқин мансабдор шахс коррупция жинояти бўйича айбланиб, жавобгарликка тортилди.
Маълум бўлишича, Ўзбекистоннинг коррупцияга қарши халқаро рейтинглардаги кўрсаткичлари ниҳоятда паст. Хусусан, Transparency International коррупция бўйича индексда мамлакат 140-ўринда турибди.
Бу борада Шавкат Мирзиёев ҳам алоҳида тўхталиб келмоқда. Жумладан, президент 20 декабрь кунги Олий Мажлис ва Ўзбекистон халқига мурожаатномасида коррупция муаммосига алоҳида тўхталиб, унинг оқибатлари билан эмас, балки сабаблари билан курашишга эътибор қаратди.
«Халқ биздан янги мактаблар, болалар боғчалари ва касалхоналар қуришни, таълим ва тиббиёт сифатини оширишни, ичимлик суви ва электр энергияси, йўл ва транспорт билан боғлиқ маҳаллий муаммоларни ҳал этишни, иш ўринлари сонини кўпайтиришни, янги тадбиркорлик имкониятларини яратишни, адолатни таъминлашни кутмоқда», — деди давлат раҳбари.
Ҳозирда Ўзбекистонда кенг жамоатчилик иштирокида коррупцияга қарши муросасиз муҳит яратилмоқда. Хусусан, жисмоний ва юридик шахсларнинг мурожаатларини кўриб чиқиш тизими тубдан такомиллаштирилди, Президентнинг Халқ ва виртуал қабулхоналари, ишонч телефони, шунингдек, вазирлик ва идораларнинг тегишли операторлари ташкил этилди.
2022 йилда «Давлат хизмати тўғрисида»ги қонун ва давлат хизматчиларининг ахлоқий хулқ-атворининг намунавий қоидалари қабул қилиниб, коррупцияга қарши тақиқ ва чекловлар белгиланди. Президент мурожаатномасида давлат органлари раҳбарларининг сиёсий-ҳуқуқий жавобгарлиги институтини жорий этишни ҳам таклиф этган.
Шунингдек, ҳукумат қарорлари, мамлакат ҳаётига тааллуқли ижтимоий-иқтисодий масалалар бўйича муҳим қарорлар қабул қилиш коллегиал тарзда, бевосита вазирлар иштирокида амалга оширилиши таклиф қилинмоқда. Депутатлар, сенаторлар, маҳаллий кенгашларга аниқ йўналишлар бўйича таҳлил ўтказиш, коррупцияга барҳам беришда фаоллик кўрсатиш топширилган.
Изоҳ (0)