Беларусь ҳудудига маҳаллий вақт билан соат 10:00 дан 11:00 гача бўлган вақт оралиғида Украинадан С-300 комплексининг ракетаси қулаб тушди. Бу ҳақда «БелТА» хабар берди.
Ҳолат юзасидан Беларусь президенти Александ Лукашенко зудлик билан огоҳлантирилди. Унинг топшириғига кўра, Тергов қўмитаси ва Мудофаа вазирлиги ходимларидан бир гуруҳ мутахассислар қулаш сабабларини аниқламоқда. Ҳозирда воқеанинг иккита асосий версияси кўриб чиқилмоқда. Улардан бирида ракета Беларусь ҳудудига яқинда Польшадаги воқеага ўхшаб нотўғри йўналишда келиб тушган. Иккинчига кўра, ракета Беларусь ҳаво мудофаа тизимларининг ишлаши натижасида уриб туширилган.
Воқеа жойида Беларусь Тергов қўмитаси, Ички ишлар ва Мудофаа вазирликлари мутахассислари ишламоқда. Қурбонлар ҳақида ҳозирча маълумот йўқ.
Эслатиб ўтамиз, 15 ноябрь куни Польшанинг Украина билан чегарадош Пржеводов қишлоғига иккита ракета тушди, икки киши ҳалок бўлди. Воқеа сабабли Польша бош вазири Матеуш Моравески хавфсизлик ва мудофаа бўйича ҳукумат қўмитасининг шошилинч йиғилишини ўтказди. Россия Хавфсизлик кенгаши раиси ўринбосари Дмитрий Медведев Польшада қулаган ракета билан боғлиқ воқеа Ғарб жаҳон уруши эҳтимолини ошираётганини исботлашини айтди.
Туркия президенти Польшага тушган ракеталарнинг Россияга алоқаси йўқлигини айтди. НАТО бош котиби ҳам ракеталарнинг Украинага тегишли экани эҳтимоли юқорилигини билдирди. Аммо бунда Киев айбдор эмаслиги, Россия жавобгар эканини айтди. Польша президенти ҳам шундай фикрларни илгари сурди. Германия ва Британия эса Польшага ракета тушишига «Путин уруши» сабабчилигини таъкидлади.
5 декабрь куни Молдованинг Украина билан чегарадош ҳудудига ҳам ракета келиб тушганди. Портламай қолган ракета Бричан шаҳри яқинидаги боғда чегара полицияси томонидан аниқланган. Ҳодиса жойи қуршаб олинган ва ҳуқуқ-тартибот ходимлари ишламоқда. Ҳозирча мамлакат Ички ишлар вазирлиги ракетанинг кимга тегишли экани ҳақида маълумот бермаган.
Изоҳ (0)