Сербия президенти Александр Вучич шимолий Косоводаги серблар чегара ўтиш жойларини тўсиб қўйган баррикадаларни бузиб ташлашга киришишини маълум қилди.
Бу ҳақда Белград ва Косоводаги серб етакчиларининг инқирозга оид учрашувидан кейин эълон қилинди. Намойишчилар Косово шимолида 10 дан ортиқ баррикадалар ўрнатган, уларни бутунлай йўқ қилиш учун икки кунгача вақт кетиши мумкин.
«Бу осон жараён эмас ва уни баъзилар айтганидек, икки соатда якунлаб бўлмайди. 24-48 соат ичида тўсиқлар олиб ташланади», — деди Вучич.
Косоводаги вазият ҳукуматнинг республика ҳудудида фақат маҳаллий авторақамлар билан юриш ҳақидаги талаблари туфайли кескинлашишни бошлади. Ноябрда маҳаллий ҳукумат серб рақамларидан фойдаланганлик учун жарима солишга ваъда берди. Асосан серблар истиқомат қиладиган Косово шимолида баррикадалар пайдо бўлди, маҳаллий аҳоли чегара пунктларига олиб борадиган йўлларни тўсиб қўя бошлади.
Декабрь ўрталарида Косово ҳукумати баррикадаларни олиб ташлашни талаб қилди, бош вазир Албин Курти Косово хавфсизлик кучлари тўсиқларни ўзлари демонтаж қилиши мумкинлигини истисно қилмади.
26 декабрга ўтар кечаси Сербия ва Косово чегарасидаги Зубин-Поток шаҳри ҳудудида НАТО кучлари патрули яқинида отишма юз берди, ҳеч ким жабрланмади. Сербия бош штаби бошлиғи Милан Мойсилович чегара яқинидаги Рашку шаҳрига жўнаб кетди. У вазиятни мураккаб деб атаб, Косово билан чегарага серб ҳарбийларини жойлаштиришга эҳтиёж борлигини айтди. Сербия қўшинлари шай ҳолатга келтирилди.
Изоҳ (0)