Норвегияда жойлашган Эрон инсон ҳуқуқлари ташкилоти Iran Human Rights (ИHR) маълумотларига кўра, Эронда ҳукуматга қарши намойишчиларнинг камида 100 нафари, жумладан, беш аёл ўлим жазосига ҳукм қилинган ёки ҳукм қилиниши кутилмоқда.

Айни пайтда ҳуқуқ ҳимоячиларининг айтишича, аслида ўлим жазоси намойишчиларнинг анча кўп қисмига таҳдид солмоқда, бироқ уларнинг оила аъзолари ҳокимиятдан қўрқиб, бу ҳақда гапирмаяпти.

Декабрда Эронда намойишчиларни қатл қилиш бошланганди. Биринчи бўлиб ёш эронлик Моҳсин Шекарий 8 декабрь куни эрталаб осилган. Шунингдек,  17 ёшли Сония Шарифийга «Худога қарши уруш олиб бориш» айби билан ҳукм чиқарилган.

Эрондаги намойишлар 

Эронда 17 сентябрдан бери давом этаётган намойишларда 400 000 га яқин одам ҳибсга олинди. Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.

Тартибсизликлар чоғида хавфсизлик ходимлари томонидан 450 дан ортиқ одам ўлдирилган.