АҚШ Хитойнинг Тайван яқинидаги ҳарбий фаолиятидан хавотирда ҳамда буни «провокацион» ва «беқарорлаштирувчи» деб ҳисоблайди. Бу ҳақда Оқ уйнинг баёнотига таяниб, Reuters хабар берди.
АҚШ президентининг маъмурияти Вашингтон Тайпейга ёрдам беришда давом этишини таъкидлади.
«Биз узоқ йиллик мажбуриятларимиз ва ягона Хитой сиёсатимизга мувофиқ Тайванга етарлича ўз мудофаа қобилиятини сақлаб қолишда ёрдамни давом эттирамиз», — дейилади Оқ уй Миллий хавфсизлик кенгаши баёнотида.
26 декабрь куни Тайван Ташқи ишлар вазирлиги бир суткада Хитой ҳарбий-ҳаво кучларининг 43 та самолёти Тайван бўғозининг ўрта чизиғини кесиб ўтгани ҳақида хабар берди. Тайванни ўз ҳудуди деб ҳисоблайдиган Хитой 25 декабрда Тайван атрофидаги денгиз ва ҳаво ҳудудида «зарба машқлари» ўтказган. Бу АҚШ ва Тайваннинг провокацияларига жавоб деб аталган.
Сўнгги йилларда Хитой ўзини ўзи бошқарадиган оролга Пекин ҳукмронлигини тан олиш учун босимни кучайтирди. Тайван ҳукумати тинчликни хоҳлашини, аммо ҳужумга учраса, ўзини ҳимоя қилишини таъкидламоқда.
23-декбар куни Хитойнинг 39 та самолёти Тайваннинг ҳаво мудофаа зонасига кирганди. Шунингдек, орол яқинида Хитой флотининг учта ҳарбий кемаси қайд этилган. Тайван ҳаво мудофаа тизимлари Хитой самолётларининг ҳаракатини кузатган. Тайван қирувчи самолётлари ҳавога кўтарилган.
Изоҳ (0)