Россиянинг Владимир вилояти қонунчилик мажлиси депутати Павел Антов 65 ёшида вафот этди. Бу ҳақда қонунчилик мажлиси сайтида хабар берилди. «ТАСС» ўз манбаларига таяниб ёзишича, депутат Ҳиндистонда дам олаётган пайтида ҳалок бўлган
Ҳиндистоннинг NDTV телеканали 25 декабрь куни Павел Антом исмли 65 ёшли россияликнинг ўлими ҳақида хабар берди. У Одиша штатида меҳмонхона деразасидан тушиб кетгани айтилмоқда, у ерда тўрт кишилик сайёҳлик гуруҳи таркибида ҳордиқ чиқараётган бўлган.
Ҳиндистон полицияси офицери NDTV’га маълум қилишича, у ўз жонига қасд қилган бўлиши мумкин. Унинг сўзларига кўра, «Павел Антом»нинг вафотидан икки кун аввал унинг йўлдошларидан бири ўша меҳмонхонада ўлик ҳолда топилган, уни NDTV Владимир Биденов деб атамоқда.
Владимирнинг «Зебра ТВ» нашри ёзишича, гап Антовнинг дўсти, Россиянинг Ёшкар-Ола шаҳридан 61 ёшли тадбиркор Владимир Биданов ҳақида бормоқда.
Россиянинг Калкуттадаги бош консули Алексей Идамкин «РИА Новости»га маълум қилишича, Одиша штати полицияси ва Калкуттадаги бош консулхона икки россияликнинг Ҳиндистонда вафот этиши билан боғлиқ воқеада шубҳали ҳеч нарса кўрмаяпти. Унинг сўзларига кўра, биринчи марҳумнинг иши бўйича суриштирув аллақачон якунланган, унинг жасади эса кремация қилинган (куйдирилган).
Павел Антов — «Владимирский стандарт» йирик гўшт ва колбаса маҳсулотларини ишлаб чиқарувчи корхона асосчиси. Владимир вилояти қонунчилик мажлисига 2018 йилда «Ягона Россия» партиясидан сайланган.
2018 йилда Forbes унинг даромадини 10 миллиард рублга баҳолаган ва уни ўзининг россиялик энг бой давлат мансабдорлари рейтингида биринчи ўринга жойлаштирган эди.
Изоҳ (0)