Жанубий Корея ҳарбий вертолётлари икки мамлакат ўртасидаги ҳарбий демаркация чизиғини кесиб ўтган Шимолий Корея учувчисиз учар қурилмаларини уриб тушириш учун қарийб юз марта ўт очди. Бу ҳақда Жанубий Кореянинг Yonhap агентлиги Корея Республикаси Штаб бошлиқлари бирлашган қўмитасига таяниб хабар бермоқда.
Эни 2 метрдан ортиқ бўлмаган дронларни бундай ўқлар билан уриб тушира олишмаган. Бешта дрондан биттаси Сеул осмонидан учиб ўтган, қолганлари Жанубий Корея ғарбидаги Канхвадо ороли яқинига борган. У демаркация чизиғи яқинида, Сеул эса ундан тахминан 50 км нарида жойлашган. Кейинроқ учар қурилмалар Жанубий Корея ҳарбийлари мониторинг зонасидан ғойиб бўлган.
Дронлар 26 декабрь куни Тошкент вақти билан тонгги 6:35 да аниқланган, шундан кейин Жанубий Корея огоҳлантирувчи хабарлар тарқатган, қирувчилар, вертолётлар ва ҳаво ҳужумига қарши мудофаа воситалари тревога бўйича ҳавога кўтарилган. Республика ўз учувчисиз учар қурилмаларини чегара яқинидаги туманларга йўналтирди.
Агентлик қайд этишича, ушбу «ҳужум» беш йил ичидаги биринчи шундай воқеа бўлган.
Эслатиб ўтамиз, Жанубий Кореянинг тревога бўйича ҳавога кўтарилган КА-1 енгил ҳужумчи самолётларидан бири ҳалокатга учради.
Транспорт вазирлиги Кимпхо ва Инчхон халқаро аэропортларига парвозларни тахминан бир соатга тўхтатиб қўйди. Бу қарор сабабларини идора маълум қилмади.
«Синьхуа» агентлиги маълумотларига кўра, Жанубий Корея Ҳарбий-ҳаво кучлари самолёти Канвондо провинциясининг Хэнсон округига қулаб тушган. Бортда бўлган икки учувчи катапульта қилиб, ўзларини қутқаришга муваффақ бўлган. Сўнг улар касалхонага етказилган. Жанговар самолёт дала ҳудудига қулаган, тинч аҳоли орасидаги қурбонлар ҳақида маълумот берилгани йўқ.
Изоҳ (0)