Электрон қора бозорда 400 млн Twitter фойдаланувчисининг шахсий маълумотлари сотувга қўйилди

Номаълум хакер Twitter’даги 400 миллион фойдаланувчи аккаунтларига кирганини даъво қилиб, Илон Маскка уларни сотиб олишни таклиф қилди. Бу ҳақда Security Affairs хабар берди.

Даркнетда (электрон қора бозор) Рюши тахаллусидан фойдаланган сотувчи 1 000 та Twitter аккаунтларига киришни очиб қўйди, бу потенциал харидорга маълумотлар сизиб чиққанини тасдиқлайди. Текширувда кичик Дональд Трамп, киберхавфсизлик бўйича мутахассис Брайан Кребс ва бошқа машҳур шахслар аккаунтининг шахсий маълумотларини топиш мумкин.

Рюшининг ўзи маълумотлар билан бирга аккаунтларни Twitter раҳбариятига, яъни Илон Маскга сотишни таклиф қилмоқда.

«Twitter ёки Илон Маск, агар сиз ёзганимни ўқиётган бўлсангиз, демак 5,4 миллион аккаунтнинг сизиб чиқиши сабабли аллақачон GDPР жаримаси (Европа Иттифоқида амалдаги маълумотларни ҳимоя қилиш бўйича умумий регламент) хавфи остидасиз. Тасаввур қилинг-а, сизиб чиққан 400 миллион аккаунт учун жарима. Facebook каби GDPРни бузганлик (533 млн фойдаланувчи маълумоти тарқалган) учун 276 миллион доллар жарима тўламасликнинг энг яхши варианти бу маълумотларни эксклюзив асосда сотиб олишдир», — дейди хакер.

Аввалроқ TikTok ходимлари ноқонуний тарзда фойдаланувчилар маълумотини олгани маълум бўлганди.  Компания ходимлари видеоплатформанинг бир қатор фойдаланувчилари, жумладан, Forbes‘нинг икки журналистнинг маълумотларини ноқонуний равишда қўлга киритган.