2022 йилнинг январь ноябрь ойларига кўра Ўзбекистоннинг ташқи савдо айланмаси 44,9 млрд долларни ташкил қилди. Бу ҳақда Давлат статистика қўмитаси хабар бермоқда.
Ташқи савдо айланмаси 2021 йилнинг мос даврига нисбатан 6,8 млрд долларга кўпайган. Йил бошидан бери Ўзбекистоннинг ташқи савдодаги энг асосий ҳамкорлари Россия ва Хитой бўлиб турибди — мос равишда 8,3 млрд ва 8,2 млрд доллар.
Ўзбекистон жаҳоннинг 200 мамлакати билан савдо алоқаларини амалга ошириб келмоқда.
Ташқи иқтисодий фаолият бўйича 20 та йирик ҳамкор-давлатлар орасидан учта давлатда фаол ташқи савдо баланси кузатилган. Булар Афғонистон, Қирғиз Республикаси ва Тожикистондир. Қолган 17 та давлатлар билан пассив ташқи савдо баланси сақланиб қолмоқда.
Ноябрь ойи Ўзбекистон учун ташқи савдода Россия ва Украина ўртасидаги уруш бошланганидан бери энг фаол ой бўлди — 4,8 млрд. Бироқ бу кўрсаткич 2021 йилнинг мос даврида 5,3 млрд доллар бўлган эди.
Ўн бир ойда Ўзбекистон импорти 27,6 млрд долларни, экспорти эса 17,4 млрд долларни ташкил қилган.
Шунингдек экспорт таркибида товарлар улуши 79,2 фоизни ташкил этиб, улар саноат товарлари (23,1 фоиз), озиқ-овқат маҳсулотлари ва тирик ҳайвонлар (8,4 фоиз) ва кимёвий воситалар ва шунга ўхшаш маҳсулотлар (7 фоиз) ҳиссасига тўғри келмоқда.
2022 йил ноябрь ойида импорт ҳажми йил бошидан бери энг юқори даражага чиқиб 2,3 млрд долларни ташкил этди ва 2021 йилнинг шу даврига нисбатан 29,8 фоизга кўпайди.
Ўзбекистон яна олтин сота бошлади
Ноябрда Ўзбекистон етти ойдан бери биринчи марта 556,7 млн долларлик олтин экспорт қилди. Мамлакат сўнгги бор март ойида ушбу қимматбаҳо металлни экспорт қилган эди.
Ўзбекистоннинг олтин экспортини тўхтатиб уни кўпроқ харид қилишни бошлашига жаҳондаги олтин нархларининг кескин пасайиши сабаб бўлган эди.
Глобал олтин нархлари март ойида 2 050 доллар атрофида шаклланган эди. Бироқ геосиёсий вазият оқибатида нархлар йил давомида 1 650 доллардан ҳам тушиб кетган эди.
Бу ҳолатда Ўзбекистон кўпроқ олтин сотиб ола бошлади ва қимматбаҳо металлни харид қилиш бўйича жаҳонда етакчилардан бирига айланди.
«Биз учун иккита омил бор: жорий нарх ва келажакдаги нарх. Нарх кўтарилмоқдами ёки у ўзининг энг юқори чўққисига етиб, пасайяптими? Бу биз излаётган дақиқа. Агар нарх кўтарилаётган бўлса, кутганимиз маъқул, — деган эди Ўзбекистон Марказий банки раиси ўринбосари Беҳзод Ҳамроев.
Ноябрь ойига келиб вазият бирмунча яхшиланди ва жаҳонда олтин нархлари 1 800 долларгача кўтарилди. Айни шу даврдан бошлаб Ўзбекистон яна олтин сотишни бошлаган.
Изоҳ (0)