Путин Медведев орқали Хитой раҳбарига қандай мурожаат етказгани маълум бўлди

Россия президенти матбуот котиби Дмитрий Песков Хавфсизлик кенгаши раиси ўринбосари Дмитрий Медведевнинг Хитойга сафари юзасидан изоҳ берди.

Ушбу ташриф чоғида Медведев Хитой раиси Си Цзиньпинга Владимир Путиннинг мурожаатини етказган эди. Песковнинг айтишича, икки давлат раҳбарлари ўртасида «иш юзасидан мурожаатлар ва бошқа мессеж (хабар)лар билан айирбошлашув» доимий равишда олиб борилади.

«У икки томонлама алоқалар, халқаро алоқалар ва илғор алоқаларга тааллуқли эди. Россия ва Хитой ўртасидаги шерикликка. Стратегик шерикликка», — дея матбуот котиби мурожаат мазмунини изоҳлади.

Шунингдек, у Медведев президент билан мунтазам мулоқотда бўлишини таъкидлади. «Сафар якунлари бўйича мулоқот ёки ҳисобот бўлганини аниқ билмайман. Лекин шубҳам йўқки, имконият юзага келиши билан, бу амалга ошади», — деди Кремль вакили.

Россия Хавфсизлик кенгаши раиси ўринбосари Дмитрий Медведев ва ХХР етакчиси Си Цзиньпин ўртасидаги учрашув 21 декабрь куни Пекинда бўлиб ўтди. Улар ўзлари раҳбарлик қиладиган партиялар ўртасидаги ҳамкорликни кучайтириш ҳақида келишиб олди, шунингдек, икки мамлакатнинг умумий ҳамкорлиги ва Украинадаги низони муҳокама қилди.