Испаниялик олимлар GJ 1002 юлдузи атрофида Ердан 16 ёруғлик йили масофасида айланиб юрувчи иккита янги экзосайёра топилганини маълум қилди. Бу ҳақда Science alert хабар берди.
Космик меъёрларга кўра, GJ 1002б ва GJ 1002c иккита янги экзосайёра бўлиб, Ерга яқин жойлашган. Мутахассислар у ерда ҳаёт учун мос шароитлар бўлиши мумкинлигини тахмин қилмоқда. Бундай сайёралар сув ва ҳаёт мавжуд бўлиши учун жуда иссиқ ҳам, совуқ ҳам эмас.
«Айни дамда бу икки сайёра Ерга ўлчами ва массаси жиҳатидан ўхшашлигини биламиз, лекин у ерда яшаш омили борлигини айтишга ҳали эрта. Бунинг учун қўшимча тадқиқотлар олиб боришимиз керак», — дейди Испаниянинг Канарейка астрофизика институти ходими Вера Мария Пессенжер.
GJ 1002b ва GJ 1002c сайёраларини аниқлаш учун олимлар фазонинг ушбу минтақасининг 100 дан ортиқ тасвирини ўрганиб, юлдуз ёруғлигини таҳлил қилган. Маълумотлар Ерга ўхшаш иккита сайёра борлигини кўрсатган. Олимлар фикрича, GJ 1002c сайёрасида бир йил атиги 20 кун давом этади.
Бу сайёраларнинг ўз юлдузига яқинлиги астрономларга улар ҳақида кўпроқ маълумот олишга ёрдам беради. Хусусан, олимлар сайёралар юзасида нафақат сув, балки кислород бор-йўқлигини ҳам аниқламоқчи. Бугунги кунга қадар астрономлар Қуёш тизимидан ташқарида 5 мингдан ортиқ сайёралар мавжудлигини тасдиқлаган. Янги технологиялар нафақат янги сайёраларни топиш, балки уларнинг ички ва атмосфера таркибини ўрганиш имконини беради.
«Бизнинг кашфиётимиз яна бир бор галактикамизда Ерга ўхшаш сайёралар камдан-кам учрамаслигини яна бир бор исботлади. Агар бу икки экзосайёрани оладиган бўлсак, энди Ерга нисбатан яқин жойлашган еттита шундай олам борлиги ҳақида биламиз», — дейди мутахассис.
Мавзуга доир: James Webb биринчи марта Қуёш тизимидан ташқаридаги сайёрани суратга олди (фото)
Изоҳ (0)