Тошкентдаги савдо мажмуасида ИИО ходими вояга етмаган болага қўполлик қилди (видео)

Ижтимоий тармоқларда вояга етмаган бола билан ИИО ходими ўртасидаги оғзаки можаро акс этган видео тарқалиб, турли муҳокамаларга сабаб бўлмоқда. Тошкент шаҳар ИИББ матбуот хизмати ҳолат юзасидан маълумот берди.

Видеода ИИО ходими болани тортқилаб олиб кетишга уринаётгани, унга 199-модда (Маъмурий жавобгарлик тўғрисидаги кодекснинг 199-моддаси — Махсус хизматларни қасддан алдаб чақирганлик — таҳр.) ходимларнинг қонуний талабга бўйсунмаётгани ҳақида гапирган. Бола эса ходим ноқонуний талаб қўяётганини, айтилган жойга ота-онаси билан бирга боришини билдирган.

Ҳолатни икки қиз видеога олган. Ходимлардан бири видеони уларнинг рухсатисиз интернетга жойламасликлари кераклигини айтган.

Пойтахт ИИББ матбуот хизмати берган маълумотга кўра, 18 декабрь куни тахминан соат 14:30 ларда вояга етмаган, 2007 йилда туғилган Ю.С. 102 рақамига қўнғироқ қилиб, Бектемир туманидаги савдо мажмуаларидан бирида қандолат маҳсулотлари ходимлари билан ўзаро жанжаллашгани юзасидан хабар берган. Мазкур хабар юзасидан етиб келган туман ИИО ФМБ ППХ ходимлари вояга етмаган Ю.С.га нисбатан қўполлик қилган.

«Тошкент шаҳар ИИББ раҳбарияти фуқароларга нисбатан ходимлар томонидан қўпол муомалада бўлиш ҳолатларини қоралайди. Видеодаги ҳолат юзасидан ички ишлар органлари ходимларига нисбатан хизмат текширув тайинланди, қисқа муддат ичида хизмат текшируви якунланиб, айбдор ходимларга нисбатан қатъий чора кўрилиши таъминланади», — дейилади хабарда.