Президент Шавкат Мирзиёев раҳбарлигида 2022 йил 15 декабрь куни ўтказилган видеоселекторда яратилган имкониятларга қарамасдан, айрим ҳудудларда аҳоли бандлигини таъминлаш кўрсаткичлари яхши эмаслиги кўрсатиб ўтилди. Жумладан, 2022 йил давомида доимий бандлар сони Фарғона вилоятининг Фурқат туманида ҳам камайган. «Дарё» мухбири Азизжон Эрматов туман ҳокими Жаҳонгир Жуманов билан учрашиб, мазкур ҳолатнинг сабаблари ва келгусида аҳоли бандлигини таъминлаш бўйича қилинадиган ишлар ҳақида сўради.
Селекторда кўрсатиб ўтилган камчиликларни бартараф этиш, унда кўтарилган асосий масала — аҳолини даромадли меҳнат билан банд қилиш бўйича муҳим вазифаларни белгилаб олдик. 2022 йилда аҳоли бандлигига кўмаклашиш, Маҳаллабай ишлаш ва тадбиркорликни ривожлантириш марказлари билан ҳамкорликда 24 мингдан ортиқ мавсумий ва доимий иш ўринлари яратилди.
Туманда 2023 йил давомида тадбиркорлик, саноат, қишлоқ хўжалиги, қурилиш, транспорт, касаначилик, ҳунармандчилик, савдо ва хизмат кўрсатиш соҳаларида 28 минг 648 нафар фуқаро бандлигини таъминлаш кўзда тутилган.
Келгуси йилда истироҳат боғи, аквапарк кўнгилочар маскани, деҳқон, буюм ҳамда қурилиш материаллари бозорлари, меҳмонхона, хусусий клиникалар, савдо мажмуалари ҳамда ишлаб чиқариш корхоналари ишга туширилади. Ушбу йўналишларда жами 4 минг 110 нафар ишсиз фуқаронинг бандлиги таъминланади.
Шунингдек, «Ардахшон» маҳалла фуқаролар йиғини ҳудудида технопарк қурилиши ҳисобига 1000 нафардан ортиқ фуқаролар доимий иш ўрнига эга бўлади.
Умуман олганда, келгуси йил бандлик дастурини тўлиқ амалга ошириш натижасида туманда бандлар сонини сезиларли даражада оширамиз. Бу орқали Фарғона вилоятини кейинги йилда «ишсизликдан холи ҳудуд»га айлантиришга муносиб ҳисса қўшамиз, — дейди Жаҳонгир Жуманов.
Мавзуга доир:
Изоҳ (0)