Украина Россиянинг БМТ Хавфсизлик кенгашидаги ноқонуний иштирокини исботлаш имконини берадиган расмий қадамлар тайёрламоқда. Бу ҳақда Украина ташқи ишлар вазири Дмитрий Кулеба Facebook’даги саҳифасида эълон қилди.
«Россия БМТ Хавфсизлик кенгашининг доимий аъзоси ўрнини 31 йил олдин юз берган очиқдан очиқ фирибгарлик схемаси натижасида тегишли қонуний асосларсиз эгаллаб турибди. Украина ҳозирда Россиянинг Хавфсизлик кенгашидаги ноқонуний иштирокини исботловчи расмий қадамларга тайёрланмоқда», — деди Кулеба.
Кулебанинг сўзларига кўра, бўлажак сиёсий жараён Россиянинг БМТ Хавфсизлик кенгашидаги ўрнидан маҳрум қилишга мўлжалланган. Украина Ташқи ишлар вазирлиги раҳбари, шунингдек, БМТ Украина шаҳарларига ҳужум қилиш учун Эрон дронларидан фойдаланишни тўхтатиш учун етарли ҳаракат қилмаётганини айтди.
Эрон дронларини Россияга етказиб бериш
«Россияга Эрон дронлари етказиб берилиши БМТ Хавфсизлик кенгашининг 2015 йилдаги Эрон билан ядровий келишувни мустаҳкамловчи резолюциясини бузади», — дейди Украина ТИВ раҳбари.
У Украина ва ҳамкорларга БМТга Эроннинг дронлари Украинадаги урушда рус қўшинлари томонидан қўлланишини ўрганувчи экспертлар миссиясини ташкил этишни таклиф қилган. Ноябрь ойида сана аллақачон келишиб олингани, аммо кейин БМТ котибияти келишилган муддатда Украинага ташриф буюришнинг иложи йўқлигини айтган.
«БМТ котибияти Эрон ва Россияни жазосиз қолдириши қабул қилиб бўлмайдиган кечикиш ва келишувдир», — дейди дипломат ва бу Хавфсизлик кенгаши резолюциясининг бузилиши ва хавфсизликка таҳдид эканини айтди.
Аввалроқ Украина президенти 19 декабрга ўтар кечаси мамлакат 34 та Эрон дронлари томонидан ҳужумга учраганини айтганди. Президент Россия қуролли кучлари Эрондан 250 та Shahed-136 камикадзе дронларини олганини таъкидлаган.
Изоҳ (0)