Ғарб мамлакатлари Россияни қўшинларни қайтадан гуруҳлаш ва қурол-яроғ захираларини тўлдириш имкониятидан маҳрум қилишга эътибор қаратиши зарур. Бу ҳақда Буюк Британия бош вазири Риши Сунак Шимолий Европа мамлакатлари етакчилари саммитида айтиб ўтди, деб ёзади Washington Examiner.
«Бу Россияга қурол етказиб бериш занжирини кузатиб, халқаро кўмакнинг олдини олиш зарурлигини билдиради», — дея аниқлик киритди у.
Шу билан бирга, Сунак Украина Ғарб мамлакатларидан кўпроқ ҳарбий ёрдам олиши кераклигини айтди. У 2023 йилда Буюк Британия Киевга камида 2,3 миллиард фунт стерлинг ажратишини, буни йирик ҳажмда артиллерия етказиб беришдан бошлашини ваъда қилди.
Шунингдек, у «Россия томонидан ўт очишни тўхтатишга қаратилган бир томонлама даъват жорий вазиятда бутунлай мантиқсиз» эканини айтди, чунки у «Россия томонидан қайта гуруҳланиш, ўз қўшинларини мустаҳкамлаш учун фойдаланилиши мумкин». Сунакнинг фикрича, Россия ўз қўшинларини олиб кетмагунига қадар ҳеч қандай реал музокаралар бўлмаслиги керак.
Россияга қурол етказиб берилиши ҳақида гапираётиб, Британия бош вазири Эронни тилга олди.
Август ойида The Washington Post газетаси Россияга Эрон дронлари етказиб берилаётгани ҳақида ёзганди. Бунгача, июль ойида АҚШ маъмурияти Теҳроннинг Москвага бир неча юзлаб учувчисиз учоқларни, жумладан, қурол олиб юришга қодир дронларни топшириш режалари ҳақида маълумотга эга эканини билдирган.
Маълумотларга кўра, Россия Украинадаги урушда Эронда ишлаб чиқарилган Shahed-131 ва Shahed-136 дронларидан фойдаланмоқда, Россия Қуролли кучлари уларнинг номини «Геран-1» ва «Геран-2» деб ўзгартириб олган. Россия расмийлари дронларнинг Эрондан олиб келинишини тан олмаяпти.
Ноябрь ойи бошида Эрон ташқи ишлар вазири Ҳусайн Абдуллоҳиан Россияга бир қанча дронлар юборилганини тасдиқлаб, бу уруш бошланишидан бир неча ой олдин содир бўлганини айтди.
Изоҳ (0)