Ҳиндистон Хитой билан чегарага «мисли кўрилмаган» даражада кўп ҳарбийларини жойлаштирди. Бу ҳақда Ҳиндистон ташқи ишлар вазири Субраманям Жайшанкар маълум қилди, деб ёзади The Indiaн Express.
Унинг сўзларига кўра, бу «2020 йилдан буён сезиларли даражада кўпайган» Хитой қўшинлари жойлаштирилишига қаршилик кўрсатиш учун қилинмоқда. Вазирнинг айтишича, Ҳиндистон армияси «ҳақиқий назорат чизиғини бир томонлама тартибда ўзгартиришга қаратилган ҳар қандай уринишларга» қарши туради.
Жайшанкар мухолифатчи сиёсатчи Пахул Ганди томонидан норозиликларга жавоб қилди, у Ҳиндистон ҳукуматини чегарада юз берган навбатдаги кескинликдан кейин «Хитой хавфи»ни эътиборсиз қолдиришда айблаганди.
9 декабрь куни Ҳиндистоннинг Аруначал-Прадеш штати ғарбидаги Таванг округида Ҳақиқий назорат чизиғи бўйлаб ҳинд ва хитой ҳарбийлари ўртасида тўқнашув бўлиб ўтгани хабар берилганди. АНИ агентлиги манбаларига кўра, иккала томондан ҳам бир неча ҳарбий хизматчи енгил жароҳатланган. Шундан кейин Ҳиндистон ва Хитой кучлари чегарадан олиб кетилган.
Кейинроқ Ҳиндистон мудофаа вазири Ражнатх Сингх мамлакат ўз ҳудудига Хитой ҳарбийлари кириб келишининг олдини олганини маълум қилди. «Хитой ва ҳинд қўшинлари ўртасида қўл жанги бўлиб ўтди. Ҳиндистон қўшинлари Хитой халқ озодлик армияси қўшинларининг ҳудудимизга киришига йўл қўймади», — деди у.
13 декабрь куни Хитой Ташқи ишлар вазирлиги вакили Ван Венбин Хитой-Ҳиндистон чегарасидаги вазият барқарор эканини ҳамда томонлар дипломатик ва ҳарбий каналлар орқали алоқада бўлиб турганини маълум қилди. Журналистларнинг тўқнашувлар ҳақидаги саволларига жавобан у «тегишли ваколатли органларга мурожаат қилишга» чақирди.
Хитой ва Ҳиндистон ўртасидаги баҳс
Ҳақиқий назорат чизиғи Жанубий Тибетда Ҳиндистон ва Хитой ўртасида талашилаётган чегара ҳудудларда шартли демаркация чизиғи бўлиб ҳисобланади. Хусусан, Ҳиндистон Тибет тоғликларининг Пекин назорати остидаги қисмлари, Аксайчин ҳудудига даъвогарлик қилмоқда, Хитойнинг даъвоси эса Ню-Дели назорати остидаги Аруначал-Прадеш ҳудудига тааллуқли.
Баҳс сабаблари ХХ аср бошига бориб тақалади, ўшанда Тибет ўз мустақиллигини эълон қилганидан кейин унинг Британия Ҳиндистони билан чегараси сўнггисининг фойдасига сурилган эди. Пекин бу қарорни тан олмади ва 1951 йилда Тибетни ўз назорати остига олгач, Ню-Делига ҳудудий талабларини билдира бошлади.
Чегара ҳудудида биринчи қуролли низо 1962 йилда юз берган, ўшанда фаол жанговар ҳаракатлар қарийб бир ой давом этган. Хитой Тавангни вақтинчалик эгаллаб олди, аммо кейинроқ чекинди ва сулҳ тузилди.
Хитой ва Ҳиндистон ҳарбийлари ўртасида бир неча марта тўқнашувлар юз берган, уларнинг сўнггиларидан бири 2020 йил июнида бўлиб ўтганди. Жанг қарийб олти соат давом этган, ўқотар қуроллар эмас, фақат таёқ, тош ва михли дубинкалар қўлланилган. 20 нафар ҳинд ҳарбийси ҳалок бўлган, Хитой томонидаги қурбонлар сони номаълум. Ҳиндистон ТИВ воқеада Хитойни айблаган.
Изоҳ (0)