Украина Қуролли кучлари бош қўмондони Валерий Залужний ҳарбийларнинг буйруқни бажаришдан бош тортганлик, хизмат жойини тарк этганлик ва жанговар шароитларда бир қатор бошқа қонунбузарликлари учун жазони кучайтирувчи қонун лойиҳасини қабул қилишга чақирди. Бош қўмондон қонунни имзолашга чақирувчи Telegram постида Украина президенти Владимир Зеленскийга мурожаат қилди.
«Армия тартиб-интизомга асосланган. Агар қонунчиликдаги бўшлиқлар унга риоя қилишни таъминламаса ва қонунга бўйсунмаганлар ҳарбий тўловларнинг 10 фоизигача бўлган жарима тўлаш ёки синов орқали жазо олиш билан чекланса, бу адолатдан бўлмайди», — деб ёзди Залужний.
Унинг таъкидлашича, ҳарбийлар томонидан буйруқларни бажармаслик ва бошқа тартиб-интизом бузилишлари туфайли фронтнинг ташлаб кетилган участкаларини бошқа ҳарбий хизматчилар билан тўлдиришга тўғри келмоқда, бу эса «йўқотишлар кўпайишига» сабаб бўлади. «Кўп ҳолларда бой берилган позицияларни ҳужум билан тиклаш қимматга тушмоқда. Бундай бўлмаслиги керак», — дея қўшимча қилди УҚК бош қўмондони.
Шунингдек, Залужний армияда «позицияларни рухсатсиз тарк этишга олиб келадиган» муаммолар мавжудлигини тан олди ва уларни бартараф этиш устида ишлаётганига ишонтирди. Қисмлар командирларининг ўзи жазосиз қолиши хавфи ҳақида гап кетганда, УҚК Бош қўмондони бундай муаммо йўқлигини, чунки улар ўз ҳаракатлари учун ҳам жавобгар эканини айтди.
Бош қўмондон назарда тутаётган қонун лойиҳаси 13 декабрь куни Украина Олий Радаси томонидан қабул қилинган ва имзолаш учун президентга юборилган эди. Ҳужжатда бир қатор ҳарбий интизомларни бузганлик учун озодликдан маҳрум қилиш муддатини ошириш назарда тутилган.
Хусусан, қонун лойиҳасида буйруққа риоя қилмаганлик учун 3 йилдан 7 йилгача, бўлинма ёки хизмат жойини ўзбошимчалик билан ташлаб кетганлик учун 5 йилдан 10 йилгача, қочоқлик учун — 5 йилдан 12 йилгача, жанг майдонини рухсатсиз тарк этганлик ёки қурол ишлатишдан бош тортганлик учун 5 йилдан 10 йилгача озодликдан маҳрум қилиш жазоси назарда тутилган.
15 декабрь куни Украина президентининг веб-сайтида фуқароларнинг ушбу қонун лойиҳасига вето қўйиш сўрови акс этган петиция чоп этилди. 20 декабрга қадар у 32 000 дан ортиқ овоз тўплаган, петицияни кўриб чиқиш учун эса 25 000 та овоз керак.
Изоҳ (0)