Россия президенти Владимир Путин мамлакатнинг Беларусни «ўзлаштириб олиш», «ўзига сингдириб олиш» режаларини рад этди ва буни сафсата деб атади. Бу ҳақда у Беларусь президенти Александр Лукашенко билан учрашув якунида ташкил қилинган матбуот анжуманида айтиб ўтди, деб ёзади «Коммерсантъ».
«Гап ўзлаштириб олишда эмас, масала иқтисодий сиёсатни келишиб олишда, худди бошқа кўплаб интеграцион бирлашмаларда бўлгани каби», — дея Путин бундай миш-мишлар ҳақидаги саволларга жавоб берди.
«Қолган ҳаммаси аслида бўлмаган нарсалар, сафсата. Бу душманларимизнинг бизнинг интеграция жараёнимизни тўхтатиб қўйишга уринишларидир. Улар эса буни дунё бозорларида ўзлари учун самарали ва хавфли рақобатчилар пайдо бўлмаслиги учун қилмоқда», — деди Россия президенти.
Россия ва Беларусь Иттифоқ давлати 2000 йил январидан буён мавжуд бўлиб келмоқда. Иттифоқ иштирокчилари умумий парламент ва конституция, ягона валюта яратишни муҳокама қилган, аммо бундай битимни қабул қилмаган. 2019 йилда Россия ташаббуси билан музокаралар қайта бошланди, 2021 йилда эса томонлар Россия ва Беларуснинг интеграциялашувига қаратилган 28 та иттифоқ дастурларни келишиб олди. Владимир Путиннинг ҳисоб-китобларига кўра, Россия ва Беларусь ўртасидаги товар айланмаси 2022 йилда рекорд даражадаги 40 миллиард долларга етади. Бу ҳақда у 19 декабрь кунги музокараларда маълум қилди.
Россия президенти Владимир Путин 19 декабрь куни ишчи ташриф билан Минскка бориб, Беларусь президенти Александр Лукашенко билан музокаралар ўтказди.
Охирги марта Россия ва Беларусь президентлари 26 сентябрь куни Сочида учрашганди. Улар иқтисодий масалаларни, Иттифоқ давлатини ҳамда «кимё, озиқ-овқат, ўғитлар соҳасидаги» қўшма режаларни муҳокама қилганди.
Путин Минскка бундан олдин 2019 йилда келган, ўшанда у Иккинчи Европа ўйинлари мусобақаларини томоша қилган ва шу жумладан, Лукашенко билан ҳам учрашганди.
Изоҳ (0)