Украина президенти Владимир Зеленский Россия Эрон дронлари билан ҳужум қилаётганини айтди. Президент Британия бирлашган экспедиция кучлари билан раҳбарлари йиғилишда бу ҳақда гапирди.
Президентга кўра, Россия қуролли кучлари Эрондан 250 та Shahed-136 камикадзе дронларини олган.
«Бу кеча (19 декабрга ўтар кечаси) Украина яна 34 та Эрон дронлари томонидан ҳужумга учради. Қурилма Россиянинг Эрондан олган янги авиатехника партияси таркибида бўлган. У 250 та Shahed дронларини ўз ичига олади», — деди у.
Президент Украинада Россия ракеталари ва Эрон дронлари доимий равишда қўлланилаётганини қайд этди. Бунда биринчи навбатда энергетика инфратузилмаси объектлари зарар кўраётгани, яқинда Россиянинг оммавий ҳужуми 22 миллион украиналикни электр энергиясиз қолдирганини таъкидлади.
«16 декабрь куни тунда 22 миллион 408 минг украиналик электр таъминотидан узилди. Ўн миллиондан ортиқ одам сув ва иссиқликсиз қолмоқда. Ҳозир уруш қачон ва қандай тугаши сизга боғлиқ. Мудофаа кучларимиз қанчалик муваффақиятли бўлса, Россиянинг ‘тажовузкорлиги’ шунчалик тез барбод бўлади», — дейди Зеленский.
19 декабрга ўтар кечаси Киевга камикадзе дронларидан ҳужум қилинди. Украина пойтахти мери Виталий Кличко шаҳарнинг Соломенский ва Шевченкивский туманларида бир неча портлаш содир бўлганини айтди. Октябрь ойи бошидан бери Россия Мудофаа вазирлиги Украинанинг ҳарбий ва энергетика инфратузилмасига мунтазам ракета зарбалари бериб келмоқда. Ҳужумларда Россия Эрондан сотиб олган дронлардан ҳам фойдаланмоқда.
Изоҳ (0)