АҚШ Россиянинг «Украинага қанақа мудофаа кўмагини тақдим этиш ҳақида буйруқ беришига» йўл қўймайди, деди Пентагон матбуот котиби Патрик Райдер.
Шу тариқа, у Россия элчихонасининг Киевга Американинг Patriot зенит-ракета мажмуалари юборилган тақдирда, «олдиндан айтиб бўлмайдиган оқибатлар» бўлиши ҳақидаги баёнотига муносабат билдирди.
Райдер Украинага зенит-ракета мажмуаси берилиши мумкинлиги ҳақидаги маълумотни изоҳлаб ўтирмади. «АҚШ Россия билан уруш ҳолатида эмас. Бизга зиддият керак эмас, биз Украинага мудофаа кўмагини тақдим этишга эътиборимизни қаратганмиз», — деди у матбуот анжуманида.
CNN маълумотларига кўра, АҚШ президенти Жо Байден маъмурияти Украинага Patriot зенит-ракета мажмуаларини юборишга тайёргарлик жараёнини якунламоқда, ушбу мажмуа жўнатилиши ҳақида шу ҳафта эълон қилиниши мумкин.
Patriot зенит-ракета мажмуаси юборилишини Пентагон раҳбари Ллойд Остин маъқуллаши керак, шундан кейин эса қарор Байден томонидан тасдиқланади.
«Албатта, Patriot комплекслари Россия қуролли кучларининг қонуний нишонига айланади. Лекин ҳозир бунга изоҳ бермаган бўлардим, сабаби зенит-ракета мажмуаларини Украинага етказиб берилиши ҳақидаги хабарлар ОАВ да тарқалмоқда. Бу нарса ишончсиз, шунинг учун расмий маълумотни кутамиз», — деган эди Кремль матбуот котиби Дмитрий Песков бу хабарга жавобан.
Изоҳ (0)