АҚШ президенти Дональд Трамп 2028 йил ноябрида бўлиб ўтадиган давлат раҳбари сайловларида вице-президент Жей Ди Венсни ўзининг эҳтимолий вориси деб атади. Бу ҳақда у Оқ уйда журналистлар билан суҳбатлашаётганда маълум қилди.
“Албатта, бу ҳақда гапиришга ҳали эрта, лекин у ажойиб иш қилмоқда ва ҳозирча энг кучли номзод бўлиши мумкин”, деди у журналистларга.
Трамп давлат котиби Марко Рубионинг Венсни 2028 йилги сайловларда “аъло” номзод деб айтган сўзларига муносабат билдиришни сўрашганида шундай жавоб берган. Трамп Рубионинг “қайсидир тарзда Жей Ди билан ҳамкорлик қилиши мумкинлигини” эътироф этган.
2016 йилда Рубио Флорида штатидан республикачи сенатор сифатида президентликка номзодини қўйган эди. Тҳе Ҳилл нашрининг ёзишича, у яна сайловларда иштирок этишини истисно қилмаяпти, бироқ Трампнинг президентлик муддати охиригача давлат котиби лавозимида қолмоқчи. Бу унинг 2028 йилда номзодини қўйишига тўсқинлик қилиши мумкин.
Венс фаолиятини АҚШ денгиз пиёдалари корпусига хизматидан бошлаган. 2005 йилда Ироққа ҳарбий мухбир сифатида юборилган. У ерда жамоатчилик билан алоқалар бўлимида хизмат қилган. Қўшма Штатларга қайтгач, Ел ҳуқуқ мактабини тамомлади, венчур капиталисти Питер Тилда ишлади ва 2017 йилда ўз фирмасини ташкил этди.
2016 йилда Венс Трампни кескин танқид қилган, уни аҳмоқ деб атаган ва Гитлерга ўхшатган эди, аммо кейинчалик унинг қарашлари ўзгарган. 2022 йил ноябрь ойида Трамп томонидан қўллаб-қувватланган Венс сенат сайловларида демократ Тим Райандан устидан ғалаба қозонди.
Шу пайтгача Трамп ўзининг эҳтимолий вориси номини айтишдан тийилиб келганди. У февраль ойидаёқ Венсни “жуда иқтидорли” деб таърифлаган бўлса-да, уни номзод сифатида кўрсатишдан ўзини тутган эди.
Шундай қилиб, Трампнинг учинчи муддатга сайланишга уриниш имконияти очиқчасига рад этилаётганга ўхшайди (бунинг учун АҚШ Конституциясига ўзгартириш киритиш керак бўларди).
Изоҳ (0)