Европарламент депутатлари 13 декабрь куни деярли бир овоздан коррупцияда гумон қилинаётган спикер ўринбосари Ева Кайлининг ваколатлари муддатидан олдин тугатилишини ёқлаб чиқди. Кайлининг ўз лавозимидан четлатилишига фақат бир депутат қарши чиқди, икки киши эса бетараф қолди. Бу Европарламент тарихидаги энг йирик деб аталаётган коррупция можароси — «Қатаргейт»нинг янги босқичидир, деб ёзади Politico.
Европарламентнинг 14 нафар вице-спикерларидан бири Ева Кайли 9 декабрь куни қўлга олинди. ОАВлар хабарларига кўра, у футбол бўйича 2022 йилги жаҳон чемпионатини ташкиллаштиришда Қатар манфаатларини лоббилаштиришда айбланмоқда. Хусусан, Le Soir газетаси маълумотлари бўйича, гап чемпионат учун объектлар қурилишида ишлаган муҳожирлар ҳуқуқларининг мунтазам бузилиб келиши билан боғлиқ айбловлар фонида мамлакат обрўсини «ювиш» ҳақида бормоқда.
Суриштирув чоғида Бельгия федерал полицияси ходимлари 20 та тинтув ўтказди, натижада қарийб бир ярим миллион евро нақд пул мусодара қилинди. Коррупция ва пул ювиш айбловлари, Кайлидан ташқари, ишнинг яна камида уч иштирокчисига нисбатан илгари сурилди, булар — Европарламент собиқ депутати ва Fight Impunity ҳуқуқни ҳимоя қилиш ассоциацияси раҳбари Пьер Антонио Панцери, Халқаро касаба уюшмалари федерацияси бош котиби Луке Визентини ҳамда Социалистлар ва демократлар прогрессиве альянси фракциясининг парламентдаги ёрдамчиси ва Ева Кайлининг шериги Франческо Жоржи. Жами эса иш бўйича камида ўн киши текширилмоқда.
Кайлининг истеъфоси бўйича овоз беришдан аввал Европарламент спикери Роберта Мецола Европа демократиясига нисбатан хавф ҳақида гапирди. «Ҳеч нарса жазосиз қолмайди. Ҳатто энг майда нарсалар ҳам. Ҳеч нарса хаспўшланишига ҳам йўл қўйилмайди. Биз парламентни ташқи таъсирлардан янада ҳимоялаш учун ўз текширувимизни бошлаймиз», — деди у ва Евроиттифоқ бу ишда Бельгия полициясига ёрдам беришини таъкидлади. Bloomberg маълумотларига кўра, Европарламентнинг ички текшируви 15 декабрдаёқ бошланиши мумкин.
Европарламент спикери бир қатор ислоҳотлар ўтказилиши ҳақида ҳам эълон қилди. Политиво маълумотларига кўра, коррупция ва четдан таъсирларга қарши кураш учун масъул бўлган вице-спикер лавозимини таъсис этиш режалаштирилмоқда. Бундан ташқари, парламент ва парламент аъзолари фаолиятининг шаффофлигини кузатиб борувчи махсус қўмита яратиш, шунингдек, Евроиттифоқ доирасида ахлоқ бўйича мустақил орган тузиш имконияти ҳам муҳокама қилинмоқда.
Европарламентда тайёрланаётган резолюция Қатар ва «унинг манфаатларига вакиллик қилувчилар» учун баъзи чекловларни ҳам кўзда тутади. Айнан қандай чекловлар бўлиши ҳозирча номаълум. Аммо шуниси аниқки, Евроиттифоқ Қатар фуқаролари учун визасиз режим киритиш масаласини кўриб чиқишни кейинга қолдиришга қарор қилди.
Қатар вакиллари коррупциявий схемаларга алоқадорлиги ҳақидаги айбловларни рад этмоқда. Қатарлик мансабдорлардан бири мамлакатни коррупция можароларига боғлашга уринишларни асоссиз деб атади.
«Қатаргейт» юзасидан европалик ўнг сиёсатчилар зудлик билан ўз муносабатларини билдирди. Франциянинг «Миллий бирлашув» партияси собиқ етакчиси Марин Ле Пен Twitter’да шундай ёзди: «Улар Чехия-Россия банкидан мутлақо шаффоф ва қонуний кредит туфайли бизни балчиққа қориштирди. Айни вақтда эса Қатар нақд пул билан тўлдирилган чамадонларни ‘яхши томонъдан бўлган порахўрларга етказган». У тилга олган кредит — тўққиз миллион евро — унинг партияси томонидан 2014 йилда First Czech Russian Bank (Биринчи Чехия-Россия банки)дан олинган эди.
Шунга ўхшаш баёнот билан Европарламентнинг «Миллий бирлашув»дан депутати Филипп Оливье ҳам чиқиш қилди. «Евроиттифоқ қолган дунёга ақл ўргатишни яхши кўради. У Венгрияга ўргатади, Польшага ўргатади. У ҳатто Frontex (Европа чегара агентлиги)га ҳам ақл ўргатади. Ундан кўра, аввал ўз ҳудудида бўлаётган нарсаларни эплаб олсин», — деди сиёсатчи ва «Евроиттифоқ — назоратсиз ишлаётган улкан қонун чиқарувчи машина» дея қўшиб қўйди.
Евроиттифоқ томонидан коррупцияга қарши етарлича курашмаётганликда айбланаётган Венгрия бош вазири Виктор Орбан «Қатаргейт» бошланганидан кейин «Европа парламентига хайрли тонг» дея пост эълон қилди. Унга мем илова қилиб, Европарламентнинг Венгириядаги коррупция юзасидан «жиддий хавотири» устидан кулди.
Изоҳ (0)