БМТ Бош котиби Қорабоғ ва Арманистонни боғловчи Лочин йўлини блокдан чиқаришга чақирди

Бирлашган Миллатлар Ташкилоти бош котиби Антониу Гутерриш Арманистон ва Тоғли Қорабоғни боғловчи ягона йўл —Лочин йўлаги атрофидаги вазиятдан хавотир билдирди ва томонларни ҳаракат эркинлигини таъминлашга чақирди. Бу ҳақда бош котиб девонига таяниб, «ТАСС» хабар бермоқда.

«Бош котиб Лочин йўлаги атрофидаги вазиятнинг ривожланишини хавотир билан кузатиб бормоқда ва томонларни эришилган келишувларга мувофиқ кескинликни пасайтиришга ҳамда йўлак бўйлаб хавфсизлик ва эркин ҳаракатланишни таъминлашга чақирмоқда», — дейилади ҳужжатда.

Бундан ташқари, Гутерриш минтақани тинч йўл билан тартибга солиш бўйича давом этаётган саъй-ҳаракатларни қўллаб-қувватлашини тасдиқлаган.

Лочин йўлаги Озарбайжоннинг Лочин вилоятидан ўтган. Бу Арманистон ва Тоғли Қорабоғни боғлайдиган олти километрлик автомобиль йўли.

12 декабрь куни ўзини экология фаоллари деб таништирган озарбайжонлик бир гуруҳ номаълум шахслар Лочин йўлагини тўсиб қўйгани хабар қилинди. Арманистон томони Боку Уч томонлама баёнотнинг олтинчи бандини қўпол равишда бузганини таъкидлади. Бандга кўра, «Лочин йўлаги Россия тинчликпарвар кучлари назорати остида бўлади, Озарбайжон республикаси эса фуқаролар, транспорт воситалари ва юк машиналарнинг Лочин йўлаги бўйлаб ҳаракатланиши хавфсизлигини кафолатлайди».

Йўлак тўсиб қўйилганидан кейин тан олинмаган Тоғли Қорабоғ республикаси Хавфсизлик кенгаши Россия тинчликпарвар кучлари қўмондонлигига мурожаат қилди.