Хитой етакчиси Си Цзиньпин жамоатчилик майдонида Россиядан «узоқлашиш»га уринаётганига қарамай, ҳукуматга Москва билан яқинроқ иқтисодий алоқалар ўрнатиш бўйича кўрсатма берган. Бу ҳақда The Wall Street Journal «Пекин сиёсий маслаҳатчилари»га таяниб хабар бермоқда.
«Си Цзиньпин сўнгги ойларда Пекин ва Москва ўртасида омма олдида масофа сақлашга ҳаракат қилмоқда. Бироқ, дипломатик нутқлар саҳнаси ортида Си Цзиньпин Россияга нисбатан узоқ муддатли ишончини чуқурлаштирмоқда», — деб ёзади газета.
WSJ манбаларига кўра, Хитой ва Россия ўртасидаги иқтисодий алоқаларни кенгайтириш режаси Россиядан нефть, газ ва қишлоқ хўжалиги маҳсулотлари импортини оширишни ўз ичига олади. Бундан ташқари, Пекин Арктикада Москва билан энергетика соҳасидаги ҳамкорликни кенгайтириш, шунингдек, Россия инфратузилмасига, хусусан, темир йўл ва портларга сармоя киритишни кўпайтириш ниятида.
Россиянинг Украинадаги босқини бошланганидан кейин Хитой Москвага қарши санкциялар киритмади ва Ғарб давлатларининг бундай чораларини қоралади. Шу билан бирга, Си Цзиньпин можарога тезроқ барҳам бериш тарафдори экани, унинг сиёсий ечими барча Европа ва Осиё мамлакатлари манфаатларига мос келишини бир неча бор таъкидлаган.
Бундан ташқари, ноябрь ойида бўлиб ўтган G20 саммитида Хитой раҳбари мафкуравий бўлиниш ва блоклар қарама-қаршилиги хавфидан огоҳлантирди, бу эса, унинг сўзларига кўра, жаҳон тараққиётига путур етказади.
13 декабрь куни Россия президенти матбуот котиби Дмитрий Песков Владимир Путин ва Си Цзиньпин ўртасида шахсий учрашувга тайёргарлик кўрилаётгани ҳақида маълум қилди.
Изоҳ (0)