Украинада собиқ президент Януковичнинг бутун мол-мулки мусодара қилинди

Украина Олий аксилкоррупция суди қарори билан мамлакат собиқ президенти Виктор Януковичнинг бутун мол-мулки давлат фойдасига мусодара қилинди. Бу ҳақда Украина Адлия вазирлиги вакиллари маълум қилди.

Суд пресс-релизида аниқлик киритилишича, Украина ҳукумати Януковичнинг «Межигоре» қароргоҳини (шу жумладан, «Хонка» клуб уйини), Сухолучедаги меҳмонхона-ресторан мажмуасини, Киевдаги квартирасини, парковка жойларини, банк ҳисобларидаги 31 миллион гривна (840 минг доллар) ва 84,9 минг доллар пулини, «Танталит» ва «Дом Лесника» МЧЖ устав капиталидаги 100 фоиз улушларини, 18,7 миллион евролик 537 дона маданий қимматликларини (китоблар, картиналар, антиквар мебель, соат, гулдон, тарихий қуроллар) мусодара этган.

Собиқ президент мол-мулкини мусодара қилиш ҳақидаги иш 2014 йилдан буён Бош прокуратура зиммасида «натижасиз» турган, 2019 йилда эса Украина Миллий аксилкоррупция бюросига ўтказилган.

«Янукович Россия Федерациясига Украинага қарши террорчилик фаолияти олиб бориш учун ҳамда агрессив урушга имконият яратгани мусодара учун асос бўлди. Бундан ташқари, у президент Зеленскийга очиқ мурожаат билан чиқиб, агрессор мамлакат шартларини қабул қилиш йўли билан урушни тўхтатишга даъват этди», — дейилади Олий аксилкоррупция суди хабарида.

Августда Украина суди Виктор Януковичнинг ўғли Александрдан 304 миллион гривна (8,2 миллион доллар) маблағни мусодара қилган эди. Пуллар Мудофаа вазирлиги Разведка бош бошқармаси ҳисобига ўтказилган.

Виктор Янукович 2014 йилги давлат тўнтаришидан сўнг мамлакатни тарк этган. 2015 йилнинг февраль ойида эса Украина бош прокуратураси собиқ президентни сиртдан жиноий жавобгарликка тортиш ишини бошлагани ва собиқ президентни экстрадация қилишни сўраб Россияга мурожаат қилгани маълум бўлган.

Бош прокуратура Януковични жиноий уюшма тузишда гумонланишини маълум қилган. 2017 йилнинг июлида эса Киевнинг Оболон суди унга нисбатан давлатга хоинлик бўйича ишни кўриб чиқишни бошлаган ва 2019 йилнинг 24 январида унга нисбатан 13 йилга озодликдан маҳрум этиш тўғрисида сиртдан ҳукм чиқарган.

Янукович, шунингдек, Евромайдон пайтида тинч аҳолининг ўлдирилиши, катта миқдордаги молиявий маблағлар ўғирланишида ҳам айбланган.

2021 йилда у «Межигоре» қароргоҳи ҳақидаги иш бўйича сиртдан ҳибсга олинди.