Яқин вақтлар ичида Евроиттифоқ ва НАТО қўшма баёнот эълон қилиб, Россияни Украина ҳудудидан ўз қуролли кучларини зудлик билан олиб кетишга чақиради, шунингдек, Украина ҳукуматини тўлиқ қўллаб-қувватлашни эълон қилади. Бу ҳақда Politico ўз манбаларига таяниб хабар бермоқда. Декларация ташкилотлар вакиллари томонидан бир йилдан ортиқроқ вақт давомида ишлаб чиқилган.
«Матннинг диққатга сазовор жойи бўлмаса-да, унинг расман эълон қилиниши муҳим дипломатик ютуққа айланган бўларди, айниқса, уни тузишга неча ойлаб вақт кетганини ҳисобга олганда», — дея нашрнинг ҳужжат билан танишиб чиққан журналистлари фикр билдирди.
Таъкидланишича, декларация эълон қилинишини кечиктирган асосий сабаб Туркия ва Кипр ўртасидаги зиддиятлар бўлган. Украина мавзусидан ташқари, матнда «Хитойнинг ўсиб бораётган шиддатли сиёсати» муаммоси ҳам кўтарилади. Politico маълумотларига кўра, Евроиттифоқ ва НАТО вакиллари ушбу баёнот билан келаси ҳафта ёки бўлмаса 2023 йил бошида чиқиш қилади.
Украинада жанговар ҳаракатларни тўхтатиш ва музокаралар жараёнига ўтишга даъватлар, шунингдек, Украина армиясини қўллаб-қувватлаш кафолатланиши ҳақидаги тезислар Европа ҳукумат органлари томонидан шу йилнинг 24 февралидан кейин эълон қилинган декларацияларнинг кўпчилигида мавжуд. Бундай баёнотлар билан Евроиттифоқ вакиллари 2014—2015 йиллардаёқ, Украина шарқида жанговар ҳаракатлар бошланганидан кейин ҳам чиққан эди.
Изоҳ (0)