Ўзбекистонда хусусий клиникаларга барча йўналишларда бюджет ҳисобидан хизмат кўрсатишга рухсат берилади

Шавкат Мирзиёев соғлиқни сақлаш тизимини янада ривожлантириш, тиббий хизматлар сифатини ошириш ва хусусий сектор иштирокини кенгайтириш чора-тадбирлари юзасидан тақдимот билан танишди.

Унда нодавлат тиббиёт ташкилотларига лицензия доирасидаги барча йўналишларда бюджет маблағлари ҳисобидан тиббий хизмат кўрсатишга рухсат бериш, аккредитациядан ўтган хусусий клиникаларга трансплантация фаолияти билан шуғулланиш имконини яратиш таклиф этилди.

Шунингдек, 2028 йилдан бошлаб аккредитациядан ўтмаган нодавлат ва республика даражасидаги давлат тиббиёт муассасаларидан Суғурта жамғармаси ҳисобидан тиббий хизмат харид қилинмаслиги белгиланиши мумкин.

Йиғилишда 2030 йил якунига қадар барча давлат тиббиёт муассасаларини босқичма-босқич мажбурий лицензиялаш режалари ҳам кўриб чиқилди. Унга кўра, 2027 йил 1 апрелгача 55 та республика даражасидаги, 2028 йил охиригача 413 та ҳудудий, 2030 йилгача эса 3 мингдан ортиқ туман ва шаҳар тиббиёт муассасалари мажбурий лицензияланади.

Хусусий тиббиётни рағбатлантириш учун иқтисодий қўллаб-қувватлаш чораларига ҳам алоҳида эътибор қаратилди. Хусусан, олис ҳудудларда янги клиникалар очиш учун 200 миллион долларлик имтиёзли кредит ресурси ажратиш, ҳар бир лойиҳа учун 10 йилгача муддатга 10 миллион долларгача кредит бериш ва асосий ставканинг 50 фоизини компенсация қилиш механизмини жорий этиш режалаштирилмоқда.

Бундан ташқари, хорижий мутахассислар учун ижтимоий солиқ ставкасини 1 фоиз этиб белгилаш, тиббий ускуна ва бутловчи қисмлар импортига божхона имтиёзлари бериш таклиф қилинди. Бу хусусий тиббиётга инвестиция жалб қилиш ва янги клиникалар очишни рағбатлантиришга хизмат қилиши кутилмоқда.

Тақдимотда соҳага инвестицияларни жалб қилишнинг янги тизими ҳам кўриб чиқилди. Бунинг учун Тиббиёт ва фармацевтика тармоғини ривожлантириш агентлигини ташкил этиш, инвесторларга “ягона дарча” тамойили асосида хизмат кўрсатиш ва давлат-хусусий шериклик лойиҳаларини профессионал асосда шакллантириш механизмини жорий этиш режалаштирилмоқда.

Шунингдек, агентлик ҳузурида инвестиция лойиҳаларини шакллантириш, келишиш ва амалга оширишга кўмаклашувчи Health Invest компанияси ташкил этилади. У соҳага тўғридан тўғри инвестицияларни жалб қилиш, давлат тиббиёт муассасаларини бошқарувга бериш ва тиббий лойиҳаларни илгари суриш билан шуғулланади.

Йиғилишда давлат тиббиёт муассасаларини корпоратив бошқарув тамойиллари асосида трансформация қилиш, шунингдек, тиббиёт объектларини лойиҳалаштириш, қуриш ва ишга туширишга оид санитария ҳамда шаҳарсозлик меъёрларини халқаро стандартларга мослаштириш бўйича таклифлар ҳам маъқулланди. Якунда давлат раҳбари мутасаддиларга тегишли топшириқлар берди.