Туркманистоннинг «Аваза» туристик зонасида 14 декабрь куни Озарбайжон президенти Илҳом Алиев, Туркия раҳбари Ражаб Тоййиб Эрдўғон ва Туркманистон президенти Сердар Бердимуҳамедов уч томонлама саммит ўтказди.
Дастлаб музокаралар тор доирада олиб борилди. Уларнинг тафсилоти ҳақида давлат раҳбарларининг матбуот хизмати хабар бермаяпти. Кейин учрашув кенгайтирилган форматда ўтказилди Туркия президенти нутқида Украинадаги уруш туфайли долзарб бўлган газ муаммосига тўхталди.
«Бутун дунё, айниқса Европа учун энергия хавфсизлиги янада муҳим. Бу борада Боку–Тбилиси–Жайҳон нефть қувури ва Жанубий газ коридори алоҳида ажралиб туради. Биз бу йўлак орқали Каспий газини Европага етказамиз. Энди Туркманистон табиий газини худди шундай тарзда Ғарб бозорларига узатиш устида иш бошлашимиз керак.
Мамлакатлар ўртасида электр энергияси бўйича ўзаро савдони ривожлантиришга катта аҳамият берамиз. Шу доирада Туркманистон ва Озарбайжондан мамлакатимизга электр энергиясини етказиши устида ишлашга тайёрмиз», — деди Эрдўғон.
Шунингдек, у Туркманистоннинг Туркий давлатлар ташкилотига тўлақонли аъзо бўлиши истагини билдирди.
«Ўтган йили кузатувчи аъзо сифатида ташкилотимизга қўшилган Туркманистоннинг тўлиқ аъзолик жараёнини якунлаш кучимизни мустаҳкамлайди», — деди у.
Шунингдек, Эрдўғон Россия–Украина уруши хавфсизлик тизимини, шунингдек, глобал тизимнинг озиқ-овқат ва энергия устунларини ларзага келтирганини айтди.
«Урушнинг салбий оқибатларини дунёнинг кўплаб минтақаларида, айниқса, рекорд даражадаги инфляция кўринишида кўряпмиз», — деди у ва можароларни фақат мулоқот орқали ҳал қилиш мумкинлигини таъкидлади. Истанбулда бошланган музокара жараёни давом этишини билдирди.
Шунингдек, Эрдўғон Туркия ўзининг мудофаа саноати маҳсулотларини ишлаб чиқариши ва экспорт қилиши мумкинлигини таъкидлади. Мулоқотда нима учун Туркия қуроллари тилга олингани сабаби очиқланмаган.
Президент уч томонлама ҳамкорлик мавзусига тўхталар экан, мамлакатлар транспорт имкониятлари яхшилангани, бироқ товар айирбошлаш ҳажмини оширишни кучайтириш зарурлигини айтди.
«Лапис Лазули транзит транспорт коридори савдо ҳажмини ошириш билан бирга минтақавий барқарорликни оширишга ёрдам беради», — деди Эрдўғон.
Илҳом Алиев 2022 йилнинг январь–октябр ойларида Озарбайжоннинг Туркия билан товар айирбошлаш ҳажми 45 фоизга ошиб, 5 миллиард долларга етгани, Туркманистон билан товар айирбошлаш ҳажми эса 5 баробарга ошгани ва бу рекорд эканини айтган. У Зангезур йўлаги, Олот эркин иқтисодий зонаси, Боку–Тбилиси–Карс темир йўли ва минтақадаги энг йирик флотнинг пойдеворини қўйиш ишлари ҳақида гапирган.
«Ҳозирда дунё янги чақириқ ва таҳдидларга дуч келмоқда. Шу сабабли мамлакатларимиз ўртасида хавфсизлик, мудофаа ва мудофаа саноати каби соҳаларда ҳамкорликни кенгайтириш аҳамиятли», — дея хулоса қилган Алиев.
Саммитда савдо, энергетика ва транспорт соҳаларида ҳамкорликни кенгайтириш ҳақида сўз юритилган. Тадбир якуни бўйича Туркманистон, Озарбайжон ва Туркия давлат раҳбарларининг биринчи саммитининг қўшма баёноти қабул қилинган ва уч томонлама ҳужжатлар имзоланган.
Изоҳ (0)