Дунёда 25 ноябрь санаси аёлларга нисбатан зўравонликка барҳам бериш куни сифатида қайд этилган. Маълумотларга кўра, Ер юзидаги аёлларнинг 35 фоизи зўравонликнинг турли шаклларига дуч келади.
Ўзбекистонда ҳам аёллар тазйиқ ва зўравонликка учраб туради. Агар тажовузга дуч келган аёл ички ишлар органларига мурожаат қилса, уларга ҳимоя ордери берилиши мумкин.
«Дарё» нашри Тошкент шаҳридаги айрим аҳоли вакилларининг аёлларга нисбатан зўравонликларга муносабати қандай эканлигига қизиқди.
Сўровномага муносабат билдирувчиларнинг кўпчилиги аёлларга нисбатан зўравонликни ўта салбий ҳолат эканлигини таъкидлади.
«Эркак кишининг аёл кишига қўл кўтариши бу — ноинсофлик. Ҳам диний, ҳам дунёвий томондан қораланади», — деди суҳбатдошлардан бири.
Айрим фикрларда эса зўравонликларда аёлларнинг ҳам айби борлиги айтилди.
«Менимча, қарс икки қўлдан чиқади. Гендер тенглиги ҳақида гапириляпти, лекин охирги пайтларда ОАВда эркак киши томонидан аёлини ўлдирганлиги ҳақидаги хабарларни кўряпмиз. Ўлдиргунга қадар бўлган жараённи ҳеч ким таҳлил қилмаяпти», — деди ўзини ҳуқуқшунос деб таништирган суҳбатдош.
Муносабатлар орасида зўравон эркакларга нисбатан жиноий жазо қўлланилиши кераклиги ҳам айтилди.
«Аёл киши нозик бўлади. Уни уриш керак эмас. Ширин гапирса, айтилган ишни қилаверади. Алдаб-алдаб йўлга солса бўлади. Зўравонлик қилган эркакларга бирор жиноий жазо қўзғатиш керак», — деди ободонлаштириш ходималаридан бири.
Бошқа бир суҳбатдош ҳам аёлларга бўладиган тазйиқларга нисбатан қонуний чораларни мустаҳкамлаш кераклигини таъкидлади.
«Аёлларга нисбатан зўравонлик ҳаракати нотўғри. Бу бутун дунёда қораланади. 2019 йилда Ўзбекистонда гендер тенглиги ҳақида қонун қабул қилинган. Эркакларга нисбатан аёллар ҳуқуқларини кўпроқ ҳимоя қилиш керак. Қонунчиликни ҳам кучайтириш лозим», — деди яна бир суҳбатдош.
Изоҳ (0)