«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 8-сони мавзуси «Маҳаллада ким нимага жавоб беради?» бўлиб, дастур меҳмони сифатида блогер, ҳуқуқшунос Зафарбек Солижонов таклиф этилди.
Зафарбек Солижоновнинг айтишича, маҳалла аҳолиси ҳудудга ким оқсоқол бўлишини ўзлари танлаши, фуқаролик позициясини намоён этиши керак.
Маҳалланинг ўзи — кичик бир давлат. Давлатни ким бошқаришини ўша давлат аҳолиси ҳал қилиши керак. Ўша бошқарувчига гапира олиш керак, ундан талаб қилиш керак, айрим ҳолларда ундаги иш массасини ҳисобга олиб, уларни тушуниш ҳам керак. Бундан ташқари, раисларнинг фойдасига, фаолиятини яхшилашга хизмат қиладиган ўзгаришларни давлатдан талаб қилишни ҳам бошлаши керак фуқароларимиз, — дейди блогер.
Унинг таъкидлашича, маҳалла оқсоқоли бўлиш — осон иш эмас. Буни ишлаган, ҳис қилган, ёнида юрган одамлар яхши билади.
Ҳозир жуда ҳам қийин босқичдамиз, ўтиш даври. Ёшлар бошқача характерга эга, шу учун маҳалла раислари олдида ёшлар бўйича маслаҳатчи лавозими ҳам бор. Қарилар ўзи бир олам, бир дунё. Улар умуман бошқа шароитда яшаган.
Ҳаммамиз бир хил тузумда яшаганимиз йўқ: капитализм, социализм, мустақиллик, янги давр... Ҳар хил авлодни ўртасидаги менежер бўлиши керак-да бу қурғур лавозим. Осон тутмаслик керак.
Мен ўйлайман, мулоқот бўлаверсин. Мулоқот ва тушуниш бўлса бизнинг ҳамма муаммоларимиз ечилиб кетади, — дея сўзларини якунлаган Зафарбек Солижонов.
Изоҳ (0)