Dunyoda 25-noyabr sanasi ayollarga nisbatan zo‘ravonlikka barham berish kuni sifatida qayd etilgan. Ma’lumotlarga ko‘ra, Yer yuzidagi ayollarning 35 foizi zo‘ravonlikning turli shakllariga duch keladi.
O‘zbekistonda ham ayollar tazyiq va zo‘ravonlikka uchrab turadi. Agar tajovuzga duch kelgan ayol ichki ishlar organlariga murojaat qilsa, ularga himoya orderi berilishi mumkin.
“Daryo” nashri Toshkent shahridagi ayrim aholi vakillarining ayollarga nisbatan zo‘ravonliklarga munosabati qanday ekanligiga qiziqdi.
So‘rovnomaga munosabat bildiruvchilarning ko‘pchiligi ayollarga nisbatan zo‘ravonlikni o‘ta salbiy holat ekanligini ta’kidladi.
“Erkak kishining ayol kishiga qo‘l ko‘tarishi bu — noinsoflik. Ham diniy, ham dunyoviy tomondan qoralanadi”, — dedi suhbatdoshlardan biri.
Ayrim fikrlarda esa zo‘ravonliklarda ayollarning ham aybi borligi aytildi.
“Menimcha, qars ikki qo‘ldan chiqadi. Gender tengligi haqida gapirilyapti, lekin oxirgi paytlarda OAVda erkak kishi tomonidan ayolini o‘ldirganligi haqidagi xabarlarni ko‘ryapmiz. O‘ldirgunga qadar bo‘lgan jarayonni hech kim tahlil qilmayapti”, — dedi o‘zini huquqshunos deb tanishtirgan suhbatdosh.
Munosabatlar orasida zo‘ravon erkaklarga nisbatan jinoiy jazo qo‘llanilishi kerakligi ham aytildi.
“Ayol kishi nozik bo‘ladi. Uni urish kerak emas. Shirin gapirsa, aytilgan ishni qilaveradi. Aldab-aldab yo‘lga solsa bo‘ladi. Zo‘ravonlik qilgan erkaklarga biror jinoiy jazo qo‘zg‘atish kerak”, — dedi obodonlashtirish xodimalaridan biri.
Boshqa bir suhbatdosh ham ayollarga bo‘ladigan tazyiqlarga nisbatan qonuniy choralarni mustahkamlash kerakligini ta’kidladi.
“Ayollarga nisbatan zo‘ravonlik harakati noto‘g‘ri. Bu butun dunyoda qoralanadi. 2019-yilda O‘zbekistonda gender tengligi haqida qonun qabul qilingan. Erkaklarga nisbatan ayollar huquqlarini ko‘proq himoya qilish kerak. Qonunchilikni ham kuchaytirish lozim”, — dedi yana bir suhbatdosh.
Izoh (0)