АҚШ Халқаро тараққиёт агентлиги (USAID) 25 ноябрь куни «Ўзбекистонда хотин-қизларга нисбатан зўравонликка қарши кураш: ютуқлар, таҳдидлар ва истиқболлар» номли халқаро конференция ташкил қилди. Бу ҳақда «Дарё» мухбири хабар берди.
Қайд этилишича, конференция Ўзбекистондаги давлат органлари, фуқаролик жамияти институтлари, халқаро ташкилотлар вакиллари ва халқаро экспертларни бирлаштириб, хотин-қизларга нисбатан зўравонликка қарши курашиш ва унинг олдини олиш мақсадида ташкилланган.
Шунингдек, конференцияда хотин-қизларга нисбатан зўравонликка барҳам бериш ва гендер тенглигини рағбатлантириш борасидаги ютуқлар ва давом этаётган муаммоларга алоҳида эътибор қаратиб ўтилди. Анжуманда сўзга чиққан USAID’нинг Ўзбекистондаги миссияси директори Микаэла Мередит шундай деди: «Қўшма Штатлар ҳукумати хотин-қизларнинг иқтисодий имкониятларини кенгайтириш, гендерга асосланган зўравонликка чек қўйиш, мамлакатда ва бутун жаҳонда тенгсизликка қарши кураш бўйича кенг қамровли режани амалга оширмоқда. Гендер зўравонликни қабул қилиб бўлмайди, у муқаррар эмас ва уни тўхтатиш мумкин».
Ўзбекистонда гендер тенглигига эришиш ва хотин-қизларга нисбатан зўравонликка қарши кураш борасида муҳим қадамлар қўйилди, жумладан, 2019 йилда «Хотин-қизларни тазйиқ ва зўравонликдан ҳимоя қилиш тўғрисида»ги қонун қабул қилинди. Ушбу қонун адолат тизимининг хотин-қизлар ва қизлар ҳуқуқларига бўлган муносабатни тубдан ўзгартирди ва ушбу қонун билан белгиланган янги кафолатларни ҳаётга татбиқ этиш бўйича аниқ ҳаракатларни белгилаб берди.
USAID бутун дунё бўйлаб инсон ҳуқуқлари поймол қилиниши, оммавий соғлиқни сақлашга таҳдидлар ҳамда хотин-қизларнинг фуқаролик, сиёсий, ижтимоий ва иқтисодий иштирокини чекланиши ва ривожланишига тўсиқ бўлган зўравонликнинг олдини олишга содиқ экани таъкидланди. Профилактикага катта эътибор қаратган ҳолатда USAID оилаларда, шахслараро муносабатларда ҳамда турли жамоат ва хусусий шароитларда хотин-қизларга қарши зўравонликнинг асосий сабабларини ҳал қилувчи дастурларга сармоя йўналтиради. Ўзбекистонда USAID хотин-қизларга нисбатан зўравонликнинг зарарли оқибатларидан хабардорликни ошириш ва унинг олдини олиш бўйича самарали дастурларни амалга ошириш учун нодавлат ташкилотлар, хотин-қизлар гуруҳи, хусусий сектор ва давлат муассасалари билан ҳамкорликни кенгайтиради.
Конференция 1991 йилда бошланган Хотин-қизларнинг глобал раҳбарлик (лидерлик) маркази томонидан «Гендер асосидаги зўравонликка қарши 16 кунлик фаоллик» кампаниясининг мувофиқлаштирилган фуқаролик жамияти ташаббуси доирасида бўлиб ўтди. Кампания ҳар йили 25 ноябрь – Халқаро хотин-қизларга нисбатан зўравонликка барҳам бериш кунидан 10 декабрь – Инсон ҳуқуқлари кунигача давом этади.
Изоҳ (0)