«Навоий» эркин иқтисодий зонасини ҳамда Навоий халқаро аэропорти юк терминалини бошқариш бўйича 25 ноябрь куни ҳужжатлар имзоланди. Бу маросимда Шавкат Мирзиёев иштирок этиб, нутқ сўзлади, деб хабар бермоқда «Дарё» мухбири.
Бугун дунёдаги геосиёсий вазият ҳар бир давлатдан ўз имконият ва ресурсларидан тўғри фойдаланиш, янги савдо ва логистика йўлакларини яратишни тақозо этмоқда. Бу борада жаҳоннинг нуфузли компаниялари билан музокаралар олиб бориб, энг мақбул таклифларни ўрганяпмиз. Мақсадимиз – мамлакатимиз экспорт салоҳиятини 2030 йилгача камида 3-4 баробарга ошириш, — деди давлат раҳбари.
«Навоий» эркин иқтисодий зонаси ҳамда Навоий халқаро аэропорти саноат ва логистика бўйича улкан имкониятларга эга. Уларда зарур инфратузилма ва тизим яратилган. Бундан самарали фойдаланиш мақсадида Бирлашган Араб Амирликларининг «DP World» компанияси билан «Навоий» эркин иқтисодий зонасини бошқариш бўйича келишув, «Terminals Holding» компанияси билан Навоий аэропорти юк терминалини бошқариш бўйича шартнома имзоланди.
«DP World» «Навоий» эркин иқтисодий зонасида хорижий инвесторлар талабларига жавоб берадиган халқаро ҳуқуқ нормаларини жорий қилиб, йирик ишлаб чиқарувчиларни жалб этади.
«Terminals Holding» компанияси Навоий халқаро аэропортининг юк айланмасини кескин ошириш ва уни йирик карго хаблари билан боғлаш билан шуғулланади. Бу ҳамкорлик Ўзбекистоннинг асосий халқаро транспорт йўлакларига интеграция бўлиши ва транзит ҳажмини камида ўн баробарга оширишига ҳисса қўшади. Умуман, ушбу икки келишув мамлакатда инновацион ва юқори технологик хизматлар кўпайиши, иқтисодиёт учун энг муҳим бўлган транспорт коммуникациялари ривожланишига хизмат қилади.
Бу икки компаниянинг Ўзбекистондаги бизнеси жадал ривожланишига тилакдошман. Мазкур лойиҳалар давлатларимиз ўртасидаги яқин ҳамкорлик миқёсини янада оширишига ишонаман, – деди сўзининг якунида президент.
Маросимда «DP World» ва «Terminals Holding» компаниялари раҳбарлари келишувлардан мамнун эканини билдириб, бу икки томон учун катта имкониятлар очишини таъкидлади. Шу билан давлат раҳбари Навоий вилоятига ташрифини якунлаб, Тошкентга қайтиб келди.
Мавзуга доир: Шавкат Мирзиёев 250 млн долларлик лойиҳа — «Зарафшон ойна» корхонасини ишга туширди (фото)
Изоҳ (0)