Украина Херсон озод қилинганидан кейин фронтдаги вазиятни тўхтатиб қўймоқчи эмас. Бу ҳақда 11 ноябрь куни миллий телемарафон эфирида Украина Миллий хавфсизлик ва мудофаа кенгаши котиби Алексей Данилов маълум қилди.
«Биз ҳеч нарсани ‘музлатиб’ қўёлмаймиз. Биз музлатиш камераси эмасмиз. Биз об-ҳавога, фаслга қарамасдан, ўз ҳудудларимизни озод қилишимиз керак. Ҳеч қанақа танаффусни кўзда тутолмаймиз, чунки у ерда бизнинг одамларимиз бор, улар қандай азоб чекаётганини, йигитларимизни, халоскорларимизни улар кўзларида ёш билан кутиб олаётганини кўряпмиз.
Шунинг учун, мамлакатимиз президенти қуролли кучларга юклаётган вазифа оддий ва тушунарли — барча ҳудудларимизни террорчилардан, истилочилардан озод қилиш. Ва бу албатта бажарилади. Бу вақт талаб қиладиган масала, холос», — деди Данилов.
The New York Times ёзишича, Херсонни озод этганидан кейин Украина қўшинлари ҳужумкор ҳаракатларни тўхтатмоқчи эмаслигини намойиш қилмоқда. Мамлакат шарқида Украина қуролли кучлари олға ҳаракатланишда давом этмоқда ҳамда Россиянинг Бахмут ва Павловкани эгаллаб олишга уринишларини бир неча марта қайтарган, жанубда эса Россиянинг Днепр чап қирғоғидаги позицияларини ўққа тутмоқда.
NYT қайд этишича, украиналик ҳарбийлар ва кўнгиллилар Украина қуролли кучлари Россиянинг Украина жанубий ҳудудлари устидан назоратига қарши курашиб, ушбу иккала фронт оралиғида, Запорожье вилояти орқали Мелитопол йўналишида жанубга янги ҳужумларга тайёрланаётганига тобора кўпроқ ишора қилмоқда.
9 ноябрь куни Россия мудофаа вазири Сергей Шойгу Россиянинг Украинага босқинига қўмондонлик қилувчи генерал Сергей Суровикиннинг таклифи билан қўшинларни Херсондан Днепрнинг чап қирғоғига олиб ўтишни буюрганди. Ушбу қарорни шаҳарни тўлиқ таъминлаш имконсизлиги ва россиялик аскарлар ҳаётини сақлаб қолишга интилиш билан изоҳлашди.
11 ноябрь куни эрталаб Россия Мудофаа вазирлиги Херсондан чекиниш ҳақида ҳисобот берди. Қайд этилишича, Днепрнинг чап қирғоғига жами 30 мингдан ортиқ россиялик ҳарбийлар ҳамда беш мингтага яқин қурол-яроғ ва ҳарбий техника олиб ўтилган. Шу куниёқ шаҳарга Украина ҳарбийлари кириб келди.
Херсон Украинада 24 февралдан буён Россия армияси томонидан эгаллаб олинган ягона вилоят маркази эди. Геническ Херсондан тахминан 200 км узоқликда, Азов денгизи соҳилларидаги Арабацкая Стрелка яқинида жойлашган.
Изоҳ (0)