Қозоғистон собиқ президенти Нурсултон Назарбоевнинг жияни Кайрат Сатибалдиулига нисбатан жиноий йўл билан қўлга киритилган маблағларни қонунийлаштириш ҳақидаги жиноят иши бўйича 230 миллион долларлик қимматбаҳо тошлар ва заргарлик буюмлари мамлакатга қайтарилди. Бу ҳақда Қозоғистон Коррупцияга қарши курашиш агентлиги хабар бермоқда.
«Узоқ хориж мамлакатларида олиб борилган тезкор-қидирув тадбирлари натижасида жиноят иши иштирокчиларига тегишли бўлган 230 миллион долларлик эксклюзив қимматбаҳо тошлар ва заргарлик буюмлари аниқланди ва республикага қайтарилди, улар давлат даромадига айлантирилди», — дейилади хабарда.
Яна 300 миллион долларни Сатибалдиули чет эл қимматли қоғозларига киритган, бу сумма тез орада Қозоғистон бюджетига келиб тушади, дея қўшиб қўйди муассаса.
Сатибалдиули турли йилларда Kazakh Oil, «Дунё корпорацияси» АЖ, «Қозоғистон темир йўллари» компанияларида раҳбар лавозимларида ишлаган. 2010—2015 йилларда «Нур Отан» ҳукмрон партияси котиби, 2018 йилгача эса Kaspi АЖ холдингининг асосий акциядорларидан бири бўлган ва у орқали Kaspi Bank банкида улушга эгалик қилган. Бундан ташқари, бир неча йиллар давомида Миллий хавфсизлик қўмитасида ҳам турли лавозимларни эгаллаган.
Шу йилнинг мартида Сатибалдиули ўз лавозими ваколатларини суиистеъмол қилиш ва ўта йирик миқдорда «Казахтелеком» маблағларини ўғирлашда гумонланиб, қўлга олинди. Кейинроқ у Транспорт сервиси марказидаги йирик миқдордаги ўғирликларда ҳам гумон қилинди.
26 сентябрь куни Остона суди Сатибалдиулини олти йилга озодликдан маҳрум қилиб, унга ўн йил мобайнида давлат хизмати, миллий компаниялар ва Миллий банкда лавозимларни эгаллашни тақиқлади. У ўз айбига иқрор бўлди, суд унинг мол-мулкини мусодара қилиш ҳақида қарор чиқарди.
2022 йил бошида юз берган оммавий норозиликлардан кейин Тўқаев Қозоғистон собиқ президенти Нурсултон Назарбоевга қариндош ва яқин бўлган бизнесменларга қарши курашни кучайтирди. Чунончи, Назарбоевнинг учта куёви, бир жияни ва яна бошқа қариндошлари давлат лавозимларидан айрилди, сиёсатчининг ўзи эса Қозоғистон Халқ ассамблеяси ва Хавфсизлик кенгашининг умрбод раислигидан четлатилди. Шунингдек, у ҳукмрон «Нур Отан» партияси раҳбарлигидан кетди.
Қосим-Жўмарт Тўқаев эса Қозоғистонда «олигархия капитализми» даври тугаб, давлатнинг мамлакат фуқаролари олдидаги ижтимоий масъулияти даври бошланганини эълон қилди.
Мавзуга доир:
Изоҳ (0)