Россия бир ой ичида учинчи марта коинотга ҳарбий сунъий йўлдошларини учирди

Ҳарбий қурилмалар ортилган «Союз-2.1б» элтувчи ракетаси Россиянинг Архангельск вилоятидаги Плесецк космодромидан учирилди. Бу ҳақда Россия Мудофаа вазирлиги хабар берди.

«Ҳарбий-космик кучлар космик қўшинларининг жанговар гуруҳлари томонидан Россия Мудофаа вазирлиги манфаатларида космик қурилма ортилган ‘Союз-2.1б» ўрта синф элтувчи ракетаси учирилди», — дейилади хабарда.

Бу сўнгги бир ой ичида Плесецкдан ҳарбий сунъий йўлдошлар билан бирга учирилган учинчи ракетадир.

Аввалроқ, 21 октябрь куни Россия Мудофаа вазирлиги Плесецкдан иккита ҳарбий сунъий йўлдош ортилган «Союз-2.1в» элтувчи ражетаси учирилгани ҳақида хабар берганди.

15 октябрь куни «Ангара-1.2» элтувчи ракетаси парвози амалга оширилган. Кейинроқ Мудофаа вазирлиги гап ҳарбий сунъий йўлдош ҳақида бораётганини маълум қилган.

10 октябрь куни ҳам Плесецкдан «Союз-2.1б» учирилган, у орбитага «ГЛОНАСС-К» навигацион космик қурилмасини олиб чиққан.

Аввалроқ Буюк Британия мудофаа штаби бошлиғи Энтони Радакин Россия космик технологиялар ёрдамида Ғарб мамлакатларига қарши ҳарбий ҳаракатлар олиб бориши мумкинлигини айтганди.

Шу йилнинг июнь ойида Россиянинг Украинадаги жанговар ҳаракатлари фонида «Роскосмос» раҳбари Дмитрий Рогозин бутун космик қурилмалар ресурси Мудофаа вазирлиги манфаатларига жалб этилганини маълум қилганди. Орбитада 160 дан ортиқ ҳарбий ва фуқаролик сунъий йўлдошлари бор, деган эди у.

Ундан аввалроқ Россия Украинадаги ҳарбий ҳаракатларни кузатиб бориш учун мингта сунъий йўлдошни ишга тушириши маълум қилинганди.