Польша Россия билан чегарада тиканли симдан тўсиқ қуришни бошлади. Бу ҳақда мамлакат мудофаа вазири Мариуш Блашчак маълум қилди.
Қайд этилишича, деворнинг баландлиги 2,5 метр бўлади.
Польша Россия билан чегарада девор қуришни режалаштираётгани ҳақида 2022 йил февралида маълум бўлган, бу ҳақда Польша миллий мудофаа вазири ўринбосари Войсеҳ Скуркевич айтиб ўтганди. «Польша—Россия чегарасида ҳали девор қурмаяпмиз, бу ҳақда эълон қилдик, холос», — деган эди Скуркевич журналистларнинг саволларига жавоб бераркан. У девор қуриш режалари Польша чегара қўриқлаш хизматини ривожлантириш концепциясига киритилганини айтганди.
Польша Россиянинг Калининград вилояти билан чегарадош бўлиб, чегаранинг умумий узунлиги 204,1 километрга тенг. Чегара зонасида аҳоли пунктлари йўқ, фақат чегара заставаси ва ўтказиш пунктлари жойлашган.
2022 йил 19 сентябрдан Польша ҳукумати россияликларнинг Шенген визаси билан мамлакатга киришини расман тақиқлаган.
Эслатиб ўтамиз, яқинда Польша Беларусь билан чегарада тўсиқ қуришни якунлаган эди.
Изоҳ (0)