Nazarboyev jiyanining ishi bo‘yicha 230 mln dollarlik qimmatbaho buyumlar Qozog‘istonga qaytarildi

Qozog‘iston sobiq prezidenti Nursulton Nazarboyevning jiyani Kayrat Satibaldiuliga nisbatan jinoiy yo‘l bilan qo‘lga kiritilgan mablag‘larni qonuniylashtirish haqidagi jinoyat ishi bo‘yicha 230 million dollarlik qimmatbaho toshlar va zargarlik buyumlari mamlakatga qaytarildi. Bu haqda Qozog‘iston Korrupsiyaga qarshi kurashish agentligi xabar bermoqda.

“Uzoq xorij mamlakatlarida olib borilgan tezkor-qidiruv tadbirlari natijasida jinoyat ishi ishtirokchilariga tegishli bo‘lgan 230 million dollarlik eksklyuziv qimmatbaho toshlar va zargarlik buyumlari aniqlandi va respublikaga qaytarildi, ular davlat daromadiga aylantirildi”, — deyiladi xabarda.

Yana 300 million dollarni Satibaldiuli chet el qimmatli qog‘ozlariga kiritgan, bu summa tez orada Qozog‘iston budjetiga kelib tushadi, deya qo‘shib qo‘ydi muassasa.

Satibaldiuli turli yillarda Kazakh Oil, “Dunyo korporatsiyasi” AJ, “Qozog‘iston temir yo‘llari” kompaniyalarida rahbar lavozimlarida ishlagan. 2010—2015-yillarda “Nur Otan” hukmron partiyasi kotibi, 2018-yilgacha esa Kaspi AJ xoldingining asosiy aksiyadorlaridan biri bo‘lgan va u orqali Kaspi Bank bankida ulushga egalik qilgan.Bundan tashqari, bir necha yillar davomida Milliy xavfsizlik qo‘mitasida ham turli lavozimlarni egallagan.

Shu yilning martida Satibaldiuli o‘z lavozimi vakolatlarini suiiste’mol qilish va o‘ta yirik miqdorda “Kazaxtelekom” mablag‘larini o‘g‘irlashda gumonlanib, qo‘lga olindi. Keyinroq u Transport servisi markazidagi yirik miqdordagi o‘g‘irliklarda ham gumon qilindi.

26-sentabr kuni Ostona sudi Satibaldiulini olti yilga ozodlikdan mahrum qilib, unga o‘n yil mobaynida davlat xizmati, milliy kompaniyalar va Milliy bankda lavozimlarni egallashni taqiqladi. U o‘z aybiga iqror bo‘ldi, sud uning mol-mulkini musodara qilish haqida qaror chiqardi.

2022-yil boshida yuz bergan ommaviy noroziliklardan keyin To‘qayev Qozog‘iston sobiq prezidenti Nursulton Nazarboyevga qarindosh va yaqin bo‘lgan biznesmenlarga qarshi kurashni kuchaytirdi. Chunonchi, Nazarboyevning uchta kuyovi, bir jiyani va yana boshqa qarindoshlari davlat lavozimlaridan ayrildi, siyosatchining o‘zi esa Qozog‘iston Xalq assambleyasi va Xavfsizlik kengashining umrbod raisligidan chetlatildi. Shuningdek, u hukmron “Nur Otan” partiyasi rahbarligidan ketdi.

Qosim-Jo‘mart To‘qayev esa Qozog‘istonda “oligarxiya kapitalizmi” davri tugab, davlatning mamlakat fuqarolari oldidagi ijtimoiy mas’uliyati davri boshlanganini e’lon qildi.