Пашинян: «Россия Қорабоғ масаласини кейинга қолдиришни таклиф қилди, Арманистон бунга рози»

Россия Тоғли Қорабоғ мақоми масаласини кейинга қолдиришни таклиф қилган, Арманистон эса бундай ёндашувга рози. Бу ҳақда республика бош вазири Никол Пашинян маълум қилди.

«Бу шу билан асосланадики, ҳозир иккала томон учун ҳам ўзаро мақбул бўлиши мумкин бўлган мақомни топиш иложсиз. Арманистон ҳукумати сиёсати бу концепцияга қанчалик тўғри келади? Тўлиқ ва 100%», — дея таъкидлади ҳукумат раҳбари.

Аввалроқ у Ғарбнинг Арманистон-Озарбайжон масаласи бўйича таклифларини мақбул деб атаганди. «Вариантлардан бири бўйича Тоғли Қорабоғ масаласига тўхталиб қолмаслик, балки ҳозирги ҳолатни маълум бир статус-кво кўринишида қайд этиб, Арманистон-Озарбайжон масаласини ҳал қилиш таклиф этилмоқда. Бу мақбул вариант», — деганди Пашинян.

31 октябрь куни Сочида Пашинян билан Озарбайжон ва Россия президентлари Илҳом Алиев ва Владимир Путин ўртасида учрашув бўлиб ўтди. Путин билан музокаралардан аввал Пашинян Россиянинг Тоғли Қорабоғдаги вазиятни тартибга солиш бўйича таклифларига Ереван рози эканлигини айтганди.

Арманистон бош вазири Сочидаги учрашувда россиялик тинчликпарварларнинг Тоғли Қорабоғдаги мандатини узайтиришни таклиф қилганини, бироқ у рад этилганини айтди. «Менимча, масала кун тартибига кирди», — дея қўшиб қўйганди у.

Путин музокараларда Арманистон ва Озарбайжон ўртасидаги низо ўн йилликлардан буён давом этаётганини, «шу сабабли уни қандайдир қилиб якунлаш кераклиги»ни айтди. У томонларни олдинга ҳаракатлантиришда ёрдам берувчи асосий нуқталарни топишга чақирди.

Алиевнинг фикрича, Тоғли Қорабоғдаги низо икки йил аввал ҳал бўлган ва бу борада «муҳокама қилинадиган деярли ҳеч нарса йўқ», аммо Боку ва Ереван алоқалари эса нормаллаштиришга муҳтож.